Búgin aýyr salmaqtaǵy boksshylar Klıchko men Povetkın kúsh synasady

Keshe olardyń salmaqtary ólshendi. Povetkın Klıchkodan jeńildeý bolyp shyqty. Povetkınniń salmaǵy 102,4 kılogramm, al Klıchkonyń salmaǵy - 109,6 kılogramm tartty, dep habarlady Lenta.rý.

Reseılik jáne ýkraındyq boksshylardyń saıysy Máskeýdiń «Olımpııskıı» sport kesheninde ótedi. Saıysty tikeleı efırden Birinshi arna kórsetedi.

37 jastaǵy Klıchko WBA (Búkilálemdik boks qaýymdastyǵy) nusqasy boıynsha «sýperchempıon» ataǵyn, sondaı-aq WBO (Búkilálemdik boks uıymy) jáne IBF (Halyqaralyq boks federatsııasy) chempıondary ataǵyn qorǵaıdy. 34 jastaǵy Povetkın WBA chempıony belbeýiniń ıegeri.

Ýkraındyq Klıchko 63 urys ótkizdi, 60 ret (51-i nokaýtpen) jeńiske jetti, úsh ret qana jeńildi. Reseılik Povetkın barlyq ótkizgen 26 jekpe-jeginde (onyń 18-i - nokaýtpen) jeńiske jetti.