Búgin Aýyl áıelderiniń búkilálemdik kúni
ASTANA. 15 qazan. QazAqparat - Búgin Aýyl áıelderiniń búkilálemdik kúni. Atalmysh datany atap ótý ıdeıasy 1995 jyly Beıjińde ótken Birikken Ulttar Uıymynyń 4-shi áıelder konferentsııasynda usynyldy jáne sol jyldan bastap atap ótiledi.
Aýyl áıelderi jer shary turǵyndarynyń tórtten bir bóliginiń astamyn quraıdy. Olardyń azyq-túlik ónimderin óndirýde, aýyldyq jerlerdiń turaqty damýynda róli joǵary. Deıturǵanmen, olar kóp jaǵdaıda ózderiniń jerge degen quqyqtaryn qorǵaı almaıdy, medıtsınalyq qyzmet, nesıeler jáne bilim syndy ómirlik mańyzdy qyzmetterge qol jetkizý múmkindikteri joq. Álemde aýyldyq jerlerde turatyn 500 mıllıon áıel kedeıshilikte ómir súredi. Olardyń qoǵamǵa salyp jatqan ómirlik úlesteri kóptegen elderde eleýsiz qalyp keledi.
Jyl saıyn 15 qazan kúni atap ótiletin Aýyl áıelderiniń búkilálemdik kúni aýyl áıelderine sheksiz qaryzdar ekendigimizdi jáne olardyń eńbekteri qajetti ekendigin qoǵamnyń esine salýǵa úndeıdi.
