Búgin Atyraýdan Reseıdiń Astrahan qalasyna jolaýshylar poıyzy júredi
ATYRAÝ. QazAqparat – Búgin Atyraýdan Reseıdiń Astrahan qalasyna jolaýshylar poıyzy júredi, dep habarlaıdy QazAqparat.
Oblystyq jolaýshylar kóligi jáne avtomobıl joldary basqarmasynyń basshysy Samat Aıtqalıevtyń málimetinshe, búgin, 20 sáýirde halyqaralyq jolaýshylar poıyzy jolǵa shyǵady.
«Atyraý qalasynan shyǵatyn jolaýshylar poıyzy jup kúnderi júredi. Al, Reseıdegi Astrahan qalasynan taq kúnderi qatynaıdy. Poıyz Atyraýdan jergilikti ýaqytpen saǵat 22:45-te qozǵalady. Júrý uzaqtyǵy – 12 saǵat 17 mınýt. Bılet baǵasy 13 myń 400 teńgeden bastalady», -deıdi Samat Aıtqalıev.
Onyń aıtýynsha, bul poıyz buryn da júrgen. Biraq, koronavırýs ınfektsııasynyń órshýine baılanysty toqtap qalǵan edi.
Sondaı-aq, byltyrdan beri Atyraý qalasynan Qurmanǵazy aýdanyndaǵy D.Nurpeıisova temirjol beketine deıin baratyn jolaýshylar poıyzy kestege sáıkes qatynaıdy.
Eske sala ketelik, budan buryn Atyraýdan Ystanbul men Máskeý baǵytyna qatynaıtyn áýe reısi ashylatynyn jazǵan edik.
