Búgin Atyraýda COVID-19 juqtyrǵan áıel 10 kún buryn Almatydan ushyp kelgen

ATYRAÝ. QazAqparat – Atyraý qalasynda dárigerler 49 jastaǵy áıeldiń COVID-19 ınfektsııasyn qaıdan juqtyrýy múmkin ekenin aıtty, dep habarlaıdy QazAqparat tilshisi.

Oblystyq densaýlyq saqtaý basqarmasy baspasóz qyzmetiniń málimetinshe, búgin koronavırýs tabylǵan 49 jastaǵy áıel 21 naýryzda Almaty – Atyraý reısimen ushyp kelgen.

Budan buryn osy reıspen ushyp kelgen 19 jastaǵy stýdent koronavırýs ınfektsııasymen aýrýhanaǵa jatqyzylǵan bolatyn. Atalǵan áıeldiń aýrýy jas jigitpen baılanysta bolǵan tulǵalardy testileý barysynda anyqtaldy.

Bul reıstiń barlyq jolaýshysy anyqtalyp, oqshaýlandy. Olar koronavırýsqa test jasap jatyr.

Qazirgi ýaqytta elde 336 adam koronavırýs juqtyrǵan, onyń ishinde Atyraý oblysynda – 13 jaǵdaı tirkeldi.