Búgin Astanadaǵy Agrarlyq ýnıversıtettiń 50 myńynshy túlegi qurmetke bólenip, saltanatty jaǵdaıda tabystalǵan dıplomyn aldy
ASTANA. Maýsymnyń 28-i. QazAqparat - Búgin Astanadaǵy S.Seıfýllın atyndaǵy Qazaq agrotehnıkalyq ýnıversıteti oqý ornynyń 50 myńynshy túlegine mamandyq dıplomyn saltanatty jaǵdaıda tabys etti.
Kongress-Holl saraıynda ótken sharaǵa ýnıversıtetti ár jyldary basqarǵan rektorlar, QR Parlamenti Májilisiniń depýtattary Kenjeǵalı Saǵadıev pen Beken Álimjanov, sondaı-aq oqý ornynyń burynǵy túlekteri bolyp tabylatyn Parlamenttiń atalmysh palatasynyń taǵy bir top depýtattary, birqatar jekemenshik kásiporyndar men memlekettik organdardyń basshylary, Qazaqstandaǵy Qytaı Elshisi Chjoý Lı jáne Qazaqstandaǵy Úndistan Elshisi Ashok Sandjanhar qatysty.
«Astananyń tuńǵysh joǵary oqý orny bolyp sanalatyn ordamyz óziniń alǵashqy dıplomdaryn 1963 jyly 250 túlekke tabystady. Ýaqyt óte kele, burynǵy Aqmola keıinnen Tselınograd aýyl sharýashylyq ınstıtýty bolǵan JOO-da jańa fakýltetter ashyldy. Al 1975 jyldan bastap orta eseppen alǵanda jylyna 1200 túlekke ómirge joldama berilip keldi. Mine, bıyl QazATÝ bul qujatty bilim qýǵan jastarǵa 48-shi ret tapsyrǵaly otyr. Búgingi tańda bizdiń túlekter jumys istemeıtin birde-bir óńir men memlekettik organ joq», - dep atap ótti óz sózinde ýnıversıtet rektory Aıtbaı Bulashev.
Bıyl QazATÝ qabyrǵasynan 1496 stýdent túlep ushatyn bolsa, onyń 194-i oqýdy úzdik aıaqtap otyr.
A.Bulashevtyń aıtýynsha, 50 myńynshy túlek - dıplomdardy tirkeý reti boıynsha anyqtaldy. Sharanyń sońyna deıin jasyryn bolyp kelgen stýdenttiń esimi - Murat Raqymjanov. Tehnıkalyq fakýltettiń túlegine arnaıy daıyndalǵan medal, sertıfıkat pen 100 myń teńge kólemindegi syıaqy tabystaldy.
Qomaqty qarjylaı syılyqty sondaı-aq, «Eń úzdik stýdent» atanǵan Jadyra Imasheva jáne ár fakýltet boıynsha úzdik dep tanylǵan 8 stýdent aldy.
