Búgin Astanada júrgizýshilerge jeńil buzýshylyqtar úshin aıyppul salynbaıdy - M.Tuıaqbaev
ASTANA. 15 qarasha. QazAqparat /Gúlmıra Alıakparova/ - Búgin Astana qalasynyń jol polıtsııasy qyzmetkerleri jeńil buzýshylyqtardy jasaǵan júrgizýshilerge aıyppul salmaıtyn bolady.
Bul týraly elordalyq Jol polıtsııasy basqarmasy (JPB) uıymdastyrý-taldaý jáne aldyn alý jumystary bóliminiń bastyǵy Marat Tuıaqbaev málim etti.
BUU Bas Assambleıasynyń 2005 jylǵy 25 qazandaǵy qararyna sáıkes qarashanyń úshinshi jeksenbisi Jol-kólik apattary qurbandaryn eske alýdyń dúnıejúzilik kúni bolyp tabylady. Osyǵan oraı Astana qalasynyń JPB 14-20 qarasha kúnderi aralyǵynda «Jol qozǵalysy aptalyǵyn», «Umytpa jáne oılan» uranymen qoǵamdyq aktsııasyn ótkizedi. Olardyń aıasynda birqatar is-sharalar uıymdastyrý josparlanyp otyr.
Máselen, 15 qarashada quqyq buzýshylyqtardyń aldyn alýǵa baǵyttalǵan «Ózara túsinistik kúni» aktsııasy ótedi. «Quqyq buzýshylarǵa ákimshilik hattamalar Jolda júrý erejelerin óreskel buzǵan jaǵdaıda ǵana toltyrylady, al basqa jaǵdaılarda úgit-nasıhattyq kórneki quraldaryn taratý arqyly aýyzsha eskertýmen shekteletin bolady», - dep atap ótti Tuıaqbaev.
Sondaı-aq, 16 qarashada, Polıtehnıkalyq kolledjde stýdentter arasynda jol qozǵalysy qaýipsizdigine arnalǵan plakattar, aýdıorolıkter men vıdeorolıkterdiń shyǵarmashylyq baıqaýy ótedi.
17 qarashada úlkenderdiń nazaryn aýdartý úshin arnaıy túzetý mektebinde balalarǵa jaryq qaıtarý zattary (flıkerler) taratylatyn bolady.
18 qarasha kúni tómengi synyp oqýshylary jol polıtsııasy qyzmetkerlerimen birge jolǵa shyǵyp, jolda júrý erejelerin buzǵan júrgizýshilerge ózderiniń joldaǵy qaýipsizdik taqyrybynda salǵan sýretterin, únqatý-shyǵarmalaryn tartý etetin bolady. «Jastar» saraıynyń aldyndaǵy Respýblıka dańǵylynda ótetin aktsııa «Júrgizýshi, meniń ómirimdi saqta!» dep atalady.
Osy kúni, jol-kólik apattarynyń zardaptaryna qoǵamnyń nazaryn aýdartý maqsatynda Jol polıtsııasy basqarmasynyń jeke quramy jappaı qan tapsyrý aktsııasyna qatysatyn bolady.
Jol polıtseıleri sońǵy kezde jıi kezdesetin úrdis - róldegi qyzdardy da umyt qaldyrmady. 19 qarasha kúni, tańerteńgi saǵat 10.00-de Turan dańǵyly boıyndaǵy ortalyq parktiń qarama-qarsy betindegi alańda júrgizýshi qyzdar arasynda mánerlep júrgizý saıysy ótedi.
Aptalyqty 20 qarasha kúni «Qara tolqyn» aktsııasy támamdaıdy. Bul kúni patrýldik polıtsııanyń ilesýimen qara tústi avtokólikter men jol apattaryna túsken mashınalar tıelgen evakýatorlardan quralǵan avtokolonna Astana kóshelerimen júrip ótetin bolady. Al dybys kúsheıtkishterden qozǵalys barysynda Jolda júrý erejelerin saqtaý jáne muqııat bolý qajettigi týraly habarlar aıtylady.
M.Tuıaqbaev, osy kúni, túski saǵat 12.00-de jol-kólik apattarynyń qurbandaryn eske alý jáne yntymaqtastyq belgisi retinde júrgizýshilerge aldyńǵy jaryq shamdaryn jaǵyp, dybys sıgnaldaryn berýdi surady. Kólik ıelerine arnaıy jadynamalar men aq lentalar taratylatyn bolady.
JPB-nyń statıstıkasyna súıensek, ústimizdegi jyldyń 10 aıynda Astanada 378 jol-kólik oqıǵasy tirkeldi, olarda 67 adam mert bolyp, 375 adam túrli jaraqattar aldy. Qoldanylyp jatqan sharalar nátıjesinde jol apattarynyń deńgeıin tómendetý múmkin boldy. Máselen, 2007 jylmen salystyrǵanda apattar sany 10,6 paıyzǵa (2007- 423 apat), zardap shekkender - 27,3 paıyzǵa (2007- 97), qaza tapqandar - 31 paıyzǵa (2007- 516) azaıdy.
