Búgin Astanada jol qozǵalysynyń qaýipsizdigine arnalǵan flesh-mob ótedi
ASTANA. QazAqparat - Búgin elordada jol qozǵalysynyń qaýipsizdigine arnalǵan jappaı flesh-mob ótedi. Іs-shara «Alystan kóringen adam aman qalady» aktsııasy aıasynda uıymdastyrylady. Bul týraly Іshki ister departamentinen habarlady, dep jazady elorda ákimdiginiń resmı saıtynda.
Astana qalasynyń ІІD Ákimshilik polıtsııa basqarmasy elorda ákimdigimen, «Avtokontrolkz» JShS-men, sonymen qatar, qaladaǵy JOO-lardyń jastar isi jónindegi komıtettermen birlesip uıymdastyrǵan is-shara búgin saǵat 18.00 ákimdiktiń aldyndaǵy qalalyq alańda ótedi. «Fesh-mob jol qozǵalysynyń qaýipsizdigine jáne jol qozǵalysyna qatysýshylardyń kıiminde jaryq shaǵylystyratyn elementterdi paıdalaný jóninde keńester berýge arnalǵan», - dep habarlaıdy baspasóz qyzmetinen. Іs-shara aıaqtalǵan soń polıtsııa qyzmetkerleri jol qozǵalysyna qatysýshylarǵa jaryq shaǵylystyratyn beldikter men jol qozǵalysy erejelerin saqtaý týraly broshıýralar taratady.
