Búgin Astanada Ulttyq ǵylymı medıtsınalyq ortalyq bazasynda «stvoldyq kletkalar» zerthanasy ashyldy
ASTANA. Shildeniń 1-i. QazAqparat /Gúlmıra Álıakparova/ - Búgin QR Densaýlyq saqtaý mınıstrligi janyndaǵy Ulttyq ǵylymı medıtsınalyq ortalyǵynda (UǴMO) «stvoldyq kletkalar» zerthanasynyń saltanatty ashylýy boldy.
Zerthana «Stemedica Cells Technologies, inc» amerıkalyq jekemenshik bıofarmatsevtıkalyq kompanııamen birlesip quryldy.
Zerthananyń ashylýynan keıin ótken baspasóz máslıhatynda Densaýlyq saqtaý mınıstri Jaqsylyq Dosqalıev atap kórsetkendeı, «stvoldyq kletkalarmen» emdelý qazaqstandyqtar úshin tegin bolady, shet el azamattaryna aqyly júrgiziledi. Málim bolǵandaı, kletkalyq materıaldyń bir dozasy - 160 myń teńgeni quraıdy.
Sondaı-aq J.Dosqalıevtyń aıtýynsha, «stvoldyq kletkalarmen» emdeý ádisi tek eresekterge ǵana qoldanylady jáne ol - qant dıabeti, baýyr, qalqansha bez, julyn, kóz, júrek-qan tamyr jáne basqa da aýrý túrlerine qoldanylady.
Vedomstvo basshysynyń sózine qaraǵanda, qazir Qazaqstanda «stvoldyq kletkalardyń» qoldanylýyna quqyq beretin barlyq qajetti normatıvti-quqyqtyq baza bar.
Taratylǵan aqparatqa sáıkes, búgingi kúni UǴMO bazasynda atalmysh tásil boıynsha naýqastardy emdeý úshin Parsy shyǵanaǵynyń birqatar elderimen kelisimsharttar jasaldy.
Aıta keteıik, «stvoldyq kletkalar» jaramsyzdyqqa ushyraǵan múshe kletkalaryn «tiriltý» úshin aǵzaǵa arnaıy tásilmen engiziledi. Keıin ol búlingen jerge baryp ornalasyp, aǵza múshesiniń jumysyn burynǵy qalpyna keltiredi. Qazaqstanda bul ádisti alǵash nasıhattaı bastaǵan mamandardyń biri - J.Dosqalıevtiń ózi bolatyn.
