Búgin Astanada «Tyraýlap ushqan tyrnalar» dramasynyń tusaýy kesiledi
ASTANA. QazAqparat - Uly Otan soǵysyndaǵy Jeńistiń 70 jyldyǵyna oraı elordadaǵy Q.Qýanyshbaev atyndaǵy Memlekettik akademııalyq qazaq mýzykalyq drama teatry 4,5,6 naýryz kúnderi «Tyraýlap ushqan tyrnalar» atty lırıkalyq dramanyń premerasyn usynady, dep habarlanǵan teatr saıtynda.
Atalmysh týyndy orys dramatýrgi Valentın Ejovtyń «Bulbuldar túni» shyǵarmasynyń jelisi boıynsha sahanalanbaq. Qazaq tiline aýdarǵan - belgili teatr synshysy, Memlekettik syılyqtyń ıegeri, professor Áshirbek Syǵaı. Rejısserlik nusqasyn Qazaqstannyń halyq ártisi, teatr jáne kıno rejısseri Talǵat Temenov jasady. Atalmysh qoıylym bas keıipker Pernebek Boranbaev pen nemis qyzy Inganyń arasynda týyndaǵan mahabbat taqyrybyn kóteredi. Onda adamzatqa ortaq qasıet - mahabbat pen jaýyzdyq, adamgershilik pen syılastyq, óshpendilik pen súıispenshilik, saǵynysh pen meıirimdiliktiń ushqyny ushtasqan. Shyǵarmanyń basty keıipkeri Pernebek Boranbaevty otandyq kıno ónerinde birneshe basty rólderdi somdap júrgen jas akter Ábilmansur Serikov sahnalasa, nemis qyzy Inganyń rólinde - teatrdyń jas aktrısasy Aqmaral Tanabaeva. Sondaı-aq munda búginde kórermenniń ystyq yqylasyna bólenip júrgen teatr ártisteri, Qazaqstannyń halyq ártisi T.Meıramov, Qazaqstannyń eńbek sińirgen qaıratkerleri A.Omarov, N.Óteýilov, QR «Daryn» jastar syılyǵynyń ıegeri S.Qashqabaev pen Q.Qystyqbaev óner kórsetedi. Spektakldiń tusaýy búgin saǵat 18.30-da Q.Qýanyshbaev atyndaǵy memlekettik akademııalyq qazaq mýzykalyq drama teatrynda kesiledi. Ony kórermender naýryz aıynyń 29 juldyzynda da tamashalaı alady.
