Búgin Astanada «Turkvizyon-2014» ánshiler baıqaýynyń jeńimpazy anyqtalady
ASTANA. QazAqparat - Búgin Astanadaǵy beıbitshilik jáne kelisim saraıynda Reseıdiń Qazan qalasynda 19 jáne 21 qarashada uıymdastyrylatyn «Turkvizyon-2014» baıqaýyna qatysý úshin qazaqstandyq ánshiler arasynda fınaldyq irikteý syndary ótedi.
«Baıqaýdyń Qazaqstandaǵy aqtyq synynda qatań irikteýden keıin tanymal ánshilermen qatar, óner álemine jańa qadam basqandar da sahnaǵa shyǵady. Olardyń qatarynda Janar Duǵalova, Nurjan Kermenbaev, Marhaba Sábıeva, Beıbit Kúshqalıev, Serik Ibragımov pen «Alashuly» toby bar. Al fınalǵa ótken taǵy bir ánshi qyzymyz Lýına ókinishke oraı, bul synǵa qatysa almaıdy. Onyń sebep-saldaryn kórermenderimiz shara ústinde biletin bolady. Bul ánshiniń ornyna «V-Alem» toby shyǵady», dep málim etti QazAqparat tilshisine sharany uıymdastyrýshylar.
Aıta keteıik, baıqaý búgin saǵat 19.00-de «Habar» arnasynan tikeleı efırde kórsetiledi.
«Baıqaý jeńimpazy túnge qaraı anyqtalady. Qazan qalasyndaǵy dúbirli dodaǵa elimizdiń atynan kimniń baratynyn qazaqstandyqtar SMS arqyly daýys berý jolymen jáne ádilqazylar anyqtaıdy. Aıta keteıik, qazylar alqasynyń quramynda kompozıtor jáne prodıýser Renat Ǵaısın, aıtysker Aınur Tursynbaeva, Astana qalasynyń mádenıet basqarmasynyń basshysy Bolat Majaǵulov, ánshi Altynaı Jorabaeva men kompozıtor Arman Dúısenov bar», - dep naqtylady uıymdastyrýshylar.
Esterińizge sala keteıik, «Turkvizyon» túrki jurtshylyǵy úshin «Evrovıdenıe» baıqaýynyń balamasy bolyp tabylady. Bul konkýrsty 300 mln.-ǵa jýyq adam tamashalaıdy.
