Búgin Astanada Shámshi Qaldaıaqov atyndaǵy halyqaralyq án festıvaliniń gala-kontserti ótedi
ASTANA. 25 qazan. QazAqparat - Búgin «Qazaqstan» kontsert zalynda Shámshi Qaldaıaqov atyndaǵy Halyqaralyq "Meniń Qazaqstanym" atty án festıvali ótedi. Bul týraly astana.kz saıtyna festıvaldyń uıymdastyrýshylary habarlady.
Gala-kontsertte QR eńbek sińirgen qaıratkerleri Tolqyn Zabırova, Jámılá Jarqymbaeva, Respýblıkalyq baıqaýlardyń laýreattary, sonymen qatar, "Saryn"toby, "IL KANTO" kvarteti, "Sholpan" bı ansambli óner kórsetedi.
Jyl saıyn ótkiziletin baıqaýǵa Qazaqstannyń túpkir-túpkirinen, sondaı-aq Reseı Federatsııasy, Mońǵolııa Halyq Respýblıkasy, Qytaı Halyq Respýblıkasy, Ózbekstan Respýblıkasy, Qyrǵyzstan Respýblıkasynan úmitkerler qatysady.
Shámshi Qaldaıaqov - tanymal kompozıtor, «qazaq valsiniń koroli». 1965 jyly jazǵan «Meniń Qazaqstanym» áni 2005 jyldan bastap Qazaqstan Respýblıkasynyń Memlekettik ánurany bolyp bekitildi. «Aq suńqarym», «Qara kóz», «Qaıyqta», «Aq bantık», «Aq mańdaılym» sııaqty kóptegen lırıkalyq ánderdiń avtory. Onyń shyǵarmashylyq qorjynynda 300-den astam án bar.
Eske sala keteıik, Astanada 22-25 qazanda Shámshi Qaldaıaqov atyndaǵy «Meniń Qazaqstanym» halyqaralyq án festıvali ótti. 22 qazanda K.Baıseıitova atyndaǵy memlekettik opera jáne balet teatrynda án festıvaliniń ashylý saltanaty ótti. Al 23 qazanda festıval laýreattaryn marapattaý rásimi boldy. Gala-kontsert 25 qazanda saǵat 19.00-de «Qazaqstan» ortalyq kontsert zalynda ótedi.
