Búgin Astanada myńnan astam túlek UBT tapsyrdy
ASTANA. QazAqparat - Búgin respýblıka boıynsha Ulttyq biryńǵaı testileý bastaldy. Birinshi kúni L.N. Gýmılev atyndaǵy Eýrazııa ulttyq ýnıversıtetinde, S. Seıfýllın atyndaǵy qazaq agrotehnıkalyq ýnıversıtetinde 1197 túlek test tapsyrdy, astana.gov.kz.
Jalpy, bıyl 4106 elordalyq túlek Ulttyq biryńǵaı testileýge qatysady. 2016 jyly 4695 oqýshy mektep bitirgen.
UBT tapsyratyn oqýshylardyń jalpy sanynan 196 oqýshy «Altyn belgi» medaline, 89-y erekshe úlgidegi attestat alýǵa úmitker.
Astanada UBT 2-6 maýsym aralyǵynda alty kezekpen ótedi. Qalalyq mektep oqýshylary biryńǵaı emtıhandy 2, 4, 6 maýsymda L.N. Gýmılev atyndaǵy Eýrazııa ulttyq ýnıversıtetinde jáne S. Seıfýllın atyndaǵy qazaq agrotehnıkalyq ýnıversıtetinde, al 3, 5 maýsymda Qazaq gýmanıtarlyq zań ýnıversıtetinde tapsyrady.
Bes pán boıynsha ótetin testileý 3,5 astronomııalyq saǵatqa jalǵasady.
