Búgin Astanada Muqan Tólebaevtyń 100 jyldyǵyna arnalǵan saltanatty kontsert ótedi
ASTANA. 27 qyrkúıek. QazAqparat - Búgin saǵat 19.00-de Beıbitshilik jáne kelisim saraıynda KSRO Halyq ártisi, qazaqtyń asa kórnekti kompozıtory, qoǵam qaıratkeri, KSRO Memlekettik syılyǵynyń laýreaty Muqan Tólebaevtyń 100 jyldyǵyna arnalǵan saltanatty kontsert ótedi.
Bul týraly QR Mádenıet jáne aqparat mınıstrliginiń baspasóz qyzmetinen habarlady.
Kompozıtor Muqan Tólebaev qazaqtyń eýropalyq úlgidegi kásibı mýzykasynyń negizin qalaýshylardyń biri bolyp sanalady. Onyń 100-den astam shyǵarmalary bar. Kompozıtordyń qalamynan shyqqan operalardyń, orkestrlik nemese vokaldy-sımfonııalyq shyǵarmalardyń, kameralyq-aspaptyq pesalardyń, ánder men romanstardyń qaı-qaısysy da tereń sezimtaldyǵymen, mýzykalyq tiliniń shynshyldyǵymen, ózindik qoltańbasymen daralanyp otyrady.
Muqańnyń kompozıtorlyq darynynyń shyrqaý shyńy bolǵan «Birjan-Sara» operasy - KSRO Memlekettik syılyǵyna ıe bolǵan shyǵarma. «Birjan Sara» - qazaqtyń HH ǵasyrdaǵy mýzykalyq mádenıetiniń eń kórnekti tabystarynyń biri.
Artyna qaıtalanbas mura qaldyrǵan Muqan Tólebaevtyń esimi el jadynda máńgi saqtalýda. Onyń mol murasy qazaq mádenıetiniń asyl qazynasy, taýsylmas baılyǵy bolyp qala bermek.
Qazaqtyń asa kórnekti kompozıtordyń 100 jyldyǵyna arnalǵan saltanatty kontsertke «Astana Opera» Memlekettik opera jáne balet teatrynyń balet trýppasy, hor men orkestri jáne basqa da óner sheberleri qatysady.
