Búgin Astanada «Mahabbat tálkegi» atty qazaqstandyq-reseılik jańa fılmniń tusaýy kesiledi
STANA. Naýryzdyń 18-i. QazAqparat /Gúlmıra Álıakparova/ - Búgin keshqurym Astanada qazaqstandyq-reseılik kınokompanııalardyń «Mahabbat tálkegi» atty birlesken fılminiń tusaýy kesiledi. Bul týraly jýrnalıstermen ótken baspasóz máslıhatynda «Qazaqfılm» AQ-nyń prezıdenti Ermek Amanshaev aıtty,
dep habarlaıdy QazAqparat.
«Qazaqfılmniń» tapsyrysymen túsirilgen «Mahabbat tálkegi» fılminiń prodıýserleri Renat Davletıarov (Reseı), Ermek Amanshaev (Qazaqstan) jáne Aleksandr Kotelevskıı (Reseı), rejısserleri Aleksandr Chernıaev (Reseı) pen Erjan Rústembekov (Qazaqstan). Basty rólderdi Qazaqstan tarapynan Ásel Saǵatova, Erik Joljaqsynov, Farhat Ábdiraıymov jáne taǵy basqalar, reseılik ártisterdiń arasynan Alekseı Chadov, Irına Rozanova, Gosha Kýtsenko jáne basqalar somdaıdy.
E.Amanshaevtyń aıtýynsha, fılm taza komedııalyq janrda túsirilgen jáne onyń bıýdjeti 2 mıllıon AQSh dollaryn quraıdy. Kartına Máskeýde jáne Astanada bir jylǵa jýyq ýaqyt túsirildi. «Bul «Qazaqfılmniń» reseılik kınokompanııalarmen birlesken alǵashqy fılmi emes, biraq táýelsizdik jyldary ishindegi tolyq aýqymdaǵy - alǵashqysy. «Mahabbat tálkegi» fılmi alǵash ret barynsha kóp danamen - 600 kóshirmemen shyǵaryldy. Buǵan deıin taralymdar sany 50-den aspaıtyn», - deıdi ol.
E.Amanshaev atap kórsetkendeı, bul úlken jetistik. Sebebi kartınanyń tanystyrylymy birdeı 4 memlekette- Qazaqstan, Reseı, Belarýs jáne Ýkraınada ótedi. «Halyqaralyq naryqqa shyǵý ońaı emes. Ony reseılik áriptesterim de jaqsy biledi. Óıtkeni Reseıdiń ózinde jylyna 100-ge jýyq kıno shyǵady», - dedi ol.
R.Davletıarovtyń sózine qaraǵanda, kartınaǵa jumsalǵan qarajat óte az. Sebebi Reseıde eń arzan degen fılmdi túsirý úshin kem degende 3 mıllıonnan astam dollar shyǵyndalady eken. «Kıno adamdar úshin túsirilýi tıis jáne ol mindetti túrde tabys ákelýi qajet. «Qazaqfılmmen» birlesken jumystan ózim úshin baǵa jetpes tájirıbe aldym», - dep atap ótti ol.
A.Chadov bolsa: «Shytyrmandy oqıǵaly fılmderge túsý úshin sport zalynan shyqpaı, denemdi shynyqtyryp júrgenmin. R. Davletıarovtan «Mahabbat tálkegi» fılminiń basty rólinde udaıy joly bolmaıtyn botanıktiń rólin oınaý týraly usynys túskennen keıin, arnaıy 8 kıláǵa aryqtadym», - deıdi. Reseılik ártis jastyq shaǵyn Qazaqstannyń Oral qalasynda turǵan ata-ájesimen birge ótkizgenin jáne oǵan eldiń jańa elordasy Astana qatty unaǵanyn jetkizdi.
Reseıdiń taǵy bir ártisi I.Rozanova da, fılmge túsýge shaqyrtýdy birden qabyldaǵanyn aıtady.
«Mahabbat tálkegi» fılmi Ásel atty asa kelbetti boıjetken jaıynda. Aýqatty kúıeý jigittiń arqasynda Áseldi qoǵamnyń betke ustar qaımaqtary árdaıym óz qatarlaryna qosyp, ózderimen teń kóredi. Alaıda ol bul ortada óz jetistikteriniń arqasynda syıly bolǵysy keledi. Oǵan bul jolda onyń qurbysy Jenıa qol ushyn sozbaq bolyp, ol úshin bir ǵana shart qoıady. Ásel dámhanaǵa alǵash kirip kelgen jigitti ózine ǵashyq etýi tıis bolady. Ol adam - ómiri joly bolmaıtyn oqymysty Ivan bolyp shyǵady. Fılmniń qyzyqty sátteri osy jerden bastap órbıdi.
