Búgin Astanada QR Sýretshiler odaǵynyń múshesi Elena Teniń kórmesi ashylady
ASTANA. QazAqparat - Búgin «Ramada Plaza Astana» oteliniń «Shejire» qazirgi zamanǵy óner galereıasynyń kórme zalynda saǵat 16.30-da QR Sýretshiler odaǵynyń múshesi Elena Teniń «Jandaný» atty jeke kórmesiniń ashylýy ótedi.
Elena Te óziniń týyndylaryn Astanada alǵashqy ret 2002 jyly «Shejire» galereıasynda kórsetti. Sýretshiniń shyǵarmashylyq qoltańbasy Astanada da tanymal, onyń jumystaryna qyzyǵýshylyq bildirýshiler kóp. Elena kóktemniń kelýimen astanalyqtardy óziniń kórkem jańalyqtarymen, shyǵarmashylyq damýynyń nátıjelerimen, izdenisterimen, tájirıbelerimen qaıta bólispekshi.
Sýretshi Almaty qalasynda týǵan, N.V. Gogol atyndaǵy kórkem ýchılışede oqyǵan, keıin Abaı atyndaǵy AMÝ kórkem-grafıkalyq fakýltetin bitirgen. 1991 jyldan respýblıkalyq jáne sheteldik kórmelerge qatysyp júr. Jumystary TMD elderi, AQSh, Frantsııa, Japonııa, Túrkııa, Izraıl, Germanııa men Qazaqstannyń jeke menshik jınaqtarynda berilgen. Sýretshi «Jandaný» kórme ekspozıtsııasyna peızaj jáne natıýrmort janryndaǵy pishindi keskindemeler dástúrinde oryndalǵan týyndylaryn usynady. Onyń avtorlyq qoltańbasy árqashanda tanymal, ony únemi jyly, aqshyl sary palıtra, álemdi sýrettep kórsetýdegi romantıkalyq ıntonatsııalar, úılesimdilikke jetýi ereksheleıdi, sondyqtan da keskindemeleriniń kompozıtsııasy únemi birqalypty, tynyshtyq pen qýanysh sezimine toly. Kóptegen detaldar men túrli reńkterge qanyq tústik massalar onyń kartınalaryna saltanatty ún qosady. Sýret pen kompozıtsııalyq sheshimderdiń naqtylyǵy burynǵy sheberlerdiń ónerine, akademııalyq dástúrlerge degen qurmetti bildiredi.
«Jandaný» kórmesinde sýretshi Elena Teniń 30 jýyq avtorlyq jumysy usynylady. Ekspozıtsııa 7 sáýirge deıin jalǵasady.
