Búgin Astanada konkı tebý sporty boıynsha Álem chempıonaty ótedi
ASTANA. QazAqparat - 28 aqpanda elordadaǵy «Alaý» muzaıdyn saraıynda konkı tebý sporty boıynsha Álem chempıonaty ótedi, oǵan álemniń 16 elinen 64 sportshy qatysady, dep habarlady Astana qalasy ákimdiginiń baspasóz qyzmetinen.
27 aqpan kúni dúbirli doda qarsańynda konkı tebý sportynan ulttyq quramanyń bas bapkeri Vadım Saıýtınniń, QR Mádenıet jáne sport mınıstrligi Sport jáne dene tárbıesi isteri jónindegi komıtet tóraǵasy Elsııar Qanaǵatovtyń, «Alaý» muzaıdyn saraıynyń dırektory Naıl Nýrovtyń jáne QR Konkı tebýshileriniń ulttyq federatsııasynyń prezıdenti Vasılıı Krylovtyń qatysýymen baspasóz máslıhaty ótti.
Vadım Saıýtınniń aıtýynsha, Álem chempıonatynda 4 sportshy Qazaqstannyń namysyn qorǵaıtyn bolady: Denıs Kýzın, Roman Krech, Aleksandr Jıgın jáne Ekaterına Aıdova. Chempıonattyń taǵy bir mańyzdy bóligi - jankúıerler. Erteń dúnıe júzinen 6 myńǵa jýyq jankúıer keledi dep kútilýde. Álem chempıonatynyń jalpy júlde qory 15 mln teńgeni quraıdy. Konkı tebýshilerdiń halyqaralyq federatsııasynan bólingen qor júldeli oryn alǵan sportshylar arasynda teń bólinedi. Sonymen qatar, QR Mádenıet jáne sport mınıstrliginiń Sport jáne dene tárbıesi isteri jónindegi komıtetiniń tóraǵasy Elsııar Qanaǵatov jeńimpaz atanǵan qazaqstandyq chempıondarǵa 15 myń dollar kóleminde memlekettik júlde qory taǵaıyndalatynyn aıtty. Álem birinshiliginiń resmı tulǵasy qaraǵandylyq sportshy - Ekaterına Aıdova. Álemdik jarystardyń baspa jáne jarnamalyq materıaldaryna onyń sýreti basylady. Konkı tebý sporty boıynsha Álem chempıonatynyń ashylýy erteń jergilikti ýaqyt boıynsha saǵat 17:30 «Alaý» muzaıdyn saraıynda ótedi. Jankúıerler úshin kirý tegin.
