Búgin Astanada Qazaq handyǵynyń 550 jyldyǵyna arnalǵan kórme ashylady

ASTANA. QazAqparat - 28 mamyrda saǵat 18:00-de elordadaǵy Táýelsizdik saraıynyń kórme zalynda Qazaq handyǵynyń 550 jyldyǵyna jáne QR Konstıtýtsııasynyń 20 jyldyǵyna arnalǵan «Tarıhqa taǵzym» ekspozıtsııasy ashylady, dep habarlaıdy astana.kz.

Astana qalasy Mádenıet basqarmasynyń habarlaýynsha, kórmede Qazaqstan Sýretshiler odaǵynyń músheleri Januzaq Músápir jáne Maqsat Beksultannyń týyndylary kópshilik nazaryna usynylady.

Januzaq Músápirdiń týyndylaryna týǵan ólkesiniń tabıǵaty arqaý bolǵan. Olar natıýrmorttar, qala kórinisteri túrinde beriledi. Erekshe nazar aýdaratyn týyndylar - etnografııalyq sıpattaǵy kartınalar. «Báıge», «Kúz», «Balyqshy», «Qobyz úni», «Han táńiri» sekildi óner týyndylarynda qazaq halqynyń tynys-tirshiligi men turmysy, týǵan ólke tabıǵaty beınelengen.

Sondaı-aq kórme qonaqtary kóptegen jas talanttardyń tálimgeri bolyp júrgen Maqsat Beksultannyń shyǵarmashylyǵymen tanysa alady. Sýretshiniń aıtýly týyndylarynyń biri - «Ańyraqaı shaıqasy» kartınasy kópshiliktiń kóńilinen ózindik ornyn alary sózsiz.