Búgin Astanada Elbasynyń qatysýymen Qazaqstan áıelderiniń tuńǵysh sezi ótedi
ANA. 5 naýryz. QazAqparat - Búgin Astanadaǵy Táýelsizdik saraıynda Memleket basshysy Nursultan Nazarbaevtyń qatysýymen Qazaqstan áıelderiniń tuńǵysh sezi ótedi.
"Qazaqstan áıelderiniń tuńǵysh quryltaıynyń kún tártibindegi negizgi másele - Qazaqstan Táýelsizdiginiń 20 jyldyǵy jáne aldaǵy 10 jylda atqarylatyn mindetterdi aıqyndap alý", - degen bolatyn aǵymdaǵy jylǵy 14 aqpanda Astanada ótken baspasóz máslıhatynda Eńbek jáne halyqty áleýmettik qorǵaý mınıstri, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraıymy Gúlshara Ábdiqalyqova.
Onyń aıtýynsha, elimizde tuńǵysh ret uıymdastyrylǵaly otyrǵan áıelder quryltaıy budan bylaı ár bes jyl saıyn ótkizilip turady. "Shara aıasynda respýblıkanyń barlyq aımaqtarynda áıelderge arnap jáshikter ornatylady. Forýmda áıelder óz maqsattary týraly aıtýy kerek. Sóıtip, árbir áıel eldegi keleli máselelerdi qalaı sheshýge bolatyny jóninde óziniń oı-pikirlerimen bólisedi. Olar eldegi demografııalyq ahýaldy jaqsartý, jumyssyzdyqty joıý týraly pikirlerin bildirýge múmkindikteri bolady. Sondaı-aq Qazaqstan Táýelsizdiginiń 20 jyldyǵyna oraı Elbasyna tilekter joldaı alady. Aımaqtardan joldanǵan hattardyń bári osy quryltaıda talqylanady. Sezd jumysyna tek delegattar emes, barlyq áıelderdiń qatysqanyn qalaımyz", - degen bolatyn baspasóz máslıhatynda G. Ábdiqalyqova.
Aıta keteıik, sezd qarsańynda Áıelder isteri, otbasylyq jáne demografııalyq saıasat jónindegi ulttyq komıssııa Qazaqstannyń azamattyq alıansymen birge 14 aqpan men 1 naýryz aralyǵynda respýblıkamyzdyń árbir aımaǵynda «Tilekter tizbegi» atty aktsııa ótkizdi. Aktsııa sezde talqylanýǵa tıisti máseleler men suraqtardy, usynystar men tilekterdi, alǵa qoıylatyn mindetterdi anyqtaý maqsatyndaǵy konferentsııalar, ǵylym men ózge salada qyzmet etip jatqan áıelderdiń, bıýdjettik mekeme qyzmetkerleriniń kezdesýi túrinde júrgizildi. Aktsııa nátıjesi áıelder sezinde qaralatyn bolady.
