Búgin Astanada «bı padıshasy» Shara Jıenqulovanyń 100 jyldyǵyna arnalǵan merekelik kontsert ótedi
ASTANA. 23 mamyr. QazAqparat - Búgin, 23 mamyr kúni (saǵat 19.00-de) Astana qalasyndaǵy K. Baıseıitova atyndaǵy ulttyq opera jáne balet teatrynda Mádenıet jáne aqparat mınıstrliginiń uıymdastyrýymen Qazaq SSR halyq ártisi, Qazaq KSR Memlekettik syılyǵynyń laýreaty, «bı padıshasy» Shara Jıenqulovanyń 100 jyldyǵyna arnalǵan kontsert ótedi, dep habarlady mınıstrliktiń baspasóz qyzmetinen.
Kontsertte QR eńbek sińirgen qaıratkerleri Shuǵyla Saparǵalıqyzy, Amanjol Áltaev, Ardaq Balajanova, respýblıkalyq baıqaýlardyń laýreattary Berik Omarov, Perızat Omarova, sonymen qatar «Shalqyma» halyq bı ansambli, Astana qalalyq Memlekettik fılarmonııasy, «Naz» Memlekettik bı ansambli, QazUÓÝ «Shabyt» bı ansambli, K.Baıseıitova atyndaǵy UOBT balet trýppasy, «Tilep» qobyzshylar kvarteti jáne «Serper» dombyrashylar ansambli óner kórsetedi.
Shara Baımoldaqyzy Jıenqulova 1912 jyly 18 tamyzda Almaty qalasynda dúnıege kelgen. Azan shaqyryp qoıǵan esimi - Gúlshara. Shara Jıenqulova 16 jasynda «Bıshi qyz» ataǵyn ıelendi. Úlken sahnadaǵy óner jolyn joldasy Qurmanbek Jandarbekovpen birge Qazaq drama teatrynda bastaǵan.
Beıimbet Maılınniń «Maıdan» pesasyndaǵy Púlish beınesi - onyń teatrdaǵy alǵashqy somdaǵan róli. Shara Jıenqulova teatrda ǵana emes, óz tańbasyn kınoda da qaldyrdy. «Amangeldi» fılminde Balym rólin somdady. Sháken Aımanovtyń «Bizdiń súıikti dáriger» fılminde qazaqtyń myń buralǵan bıshisi ózin-ózi somdady. 1938 jyly qazaqtyń tuńǵysh baleti «Qalqaman-Mamyr» qoıylymynda ol basty keıipker Mamyrdyń partııasyn oryndady.
