Búgin Astanada «Aıman-Sholpan» qoıylymynyń zaman aǵymyna saı ózgertilgen jańa nusqasynyń premerasy bolady

Qoıylymnyń rejısseri - QR eńbek sińirgen qaıratkeri Álimbek Orazbekov.

Jańarǵan qoıylym ázilmen árlengen ádemi mýzykalyq komedııa. Degenmen, shyǵarmanyń mazmuny ózgertilgen joq, onyń tek sahnalyq berilý tásili ózgerdi. Qoıylymdy zaman úrdisine saı jańasha túrletý ıdeıasy, teatr kórermenderiniń negizin qurap otyrǵan jastardyń kóńilinen shyǵý maqsatynda týyndaǵan.

M.Áýezov óz shyǵarmasynda Aımannyń beınesi arqyly qazaq qyzdarynyń izettilik pen ınabattylyǵyn, keń peıildiligin, tapqyrlyǵyn, kúsh-qaıratyn sýrettedi. Kórermen oqıǵa jelisimen birge, qazaq halqynyń salt-dástúrin tamashalap, áýezdi klassıkalyq áýendermen qulaq quryshyn qandyrdy. Al jańa qoıylymda Áýezovtyń klassıkalyq keıipkerleri - Aıman men Sholpan búgingi zamanǵy «olıgarhtyń» erke qyzdaryna, Álibek ıntellıgentsııa ókiline, Arystan men Kótibar «jańa qazaq» beınesine aınaldy. Jaras dı-djeıdiń, Teńge - «vamp áıeliniń» beınesinde kórinis tabady. Sondaı-aq, kórermender aıtys pen zamanaýı bı úlgilerin tamashalaıtyn bolady. Jańadan jazylǵan ánderdiń avtory Qaırat Toqymbetov.