Búgin Astanada «100 mektep, 100 aýrýhana» baǵdarlamasy aıasynda salynǵan eki jańa mektep ashyldy
ASTANA. Qyrkúıektiń 1-i. QazAqparat /Gúlmıra Álıakparova/ - Búgin, qyrkúıek 1-i - Bilim kúni, Astana qalasynda «100 mektep, 100 aýrýhana» baǵdarlamasy aıasynda salynǵan eki jańa mektep ashyldy.
Árqaısysy 1200 orynǵa laıyqtalǵan № 64 jáne № 65-shi mektepter «Stepnoı» garajdar kooperatıvi aýmaǵynda jáne Tilendıev dańǵyly boıynda ornalasqan. Bilim nysandarynyń saltanatty ashylýy búgin aýdan ákimderi men Bilim berý basqarmasy ókilderiniń qatysýymen ótti.
Jyl sońyna deıin elordada jańa taǵy 4 mektep esikterin aıqara ashatyn bolady (Tilendıev dańǵylynyń ońtústik betinde - 1200 oryn, Ilınka kentinde - 1200, Kóktal-2 kentinde - 800, qalanyń jańa ákimshilik ortalyǵynda - 1200).
Bıylǵy oqý jyly qarsańynda sondaı-aq 9 mektep kúrdeli jóndeýden ótti.
2010-2011 oqý jylynyń basynda Astanada 80 mektep jumys istep tur. Olardyń ishinde 65 - memlekettik, 15 - jekemenshik nysanda. Memlekettik 65 mekteptiń 19-y - qazaq tildi, 10 - orys tildi jáne 36 - aralas mektepter.
