Búgin «Astana Operada» Motsarttyń sońǵy shyǵarmasy «Rekvıem» oryndalady
ASTANA. QazAqparat - Búgin «Astana Opera» teatrynyń Mármár zalynda Motsarttyń sońǵy shyǵarmasy - «Rekvıem» oryndalady. Bul týraly teatrdyń baspasóz qyzmetinen abarlady.
«Astana Opera» dırıjeri Abzal Muhıtdınov «Rekvıemniń» mýzykasynda jan tebirentetin saǵynysh pen sheksiz ýaıym úndesetinin aıtty.
«Kórnekti kompozıtor bul týyndysyn ómirden ozar aldynda jazǵan. «Rekvıem» kompozıtordyń sońǵy týyndysy ekeniniń ózi onyń mýzykasy erekshe, búkil ómirdiń epılogi retinde qabyldaýǵa májbúrleıdi. Bul týyndy onyń shyǵarmashylyǵyndaǵy sońǵy núkte bolý kerektigin ol ózi de bildi. Kompozıtordyń asqan jyldamdyqpen jumys istegenine qaramastan, uly týyndy aıaqsyz qalady. «Rekvıemdi» Motsarttyń shákirti Frants Ksaver Zıýsmaır aıaqtaıdy, bul úshin ol shyǵarmanyń nobaıyn paıdalandy, kim biledi, múmkin ol jumysty aıaqtaý úshin Motsarttyń kózi tirisinde bergen nusqaýyna da súıengen shyǵar», - deıdi Abzal Muhıtdınov. «Motsarttyń asa tanymal ári eń aıtýly týyndylarynyń biri - «Rekvıem» «Astana Opera» tyńdarmandarynyń arasynda joǵary suranysqa ıe bolǵanyn atap óteıik. Osylaısha, klassıkalyq mýzykany súıer qaýymnyń ótinishi boıynsha atalǵan shyǵarma Óner ordasynda qaıta oryndalady», delingen habarlamada.
