Búgin Astana, Almaty qalalarynda jáne oblys ortalyqtarynda Prezıdenttik Jańajyldyq shyrsha merekesi bolady
ASTANA. 26 jeltoqsan. QazAqparat - Prezıdenttik shyrshanyń basty qatysýshylary jetim, ata-ana qamqorlyǵynsyz qalǵan, az qamtylǵan jáne kópbalaly otbasylardan shyqqan balalar, sondaı-aq bilim, sport, óner nemese shyǵarmashylyq ómirde jetistikterge jetken balalar bolady.
Bıylǵy jyly shyrshaǵa árbir aımaqta 200 bala, «Baldáýren» respýblıkalyq oqytý-saýyqtyrý ortalyǵyna 300 bala shaqyryldy. Respýblıka boıynsha qatysýshylardyń jalpy sany - 3500 bala.
Jańajyldyq mereke Oqýshylar saraılarynda, Mádenıet saraılarynda, taǵy basqa jerlerde ótkiziledi.
Árıne, dástúr boıynsha merekede el Prezıdentiniń quttyqtaýy bolady. Prezıdenttiń beınequttyqtaýy búkil respýblıka boıynsha bir ýaqytta beriledi.
Bıylǵy jylǵy jańajyldyq kórinistiń óte ádemi jáne patrıottyq ataýy bar - «Qazaqstannyń juldyzdy qadamdary». Teatrlandyrylǵan kóriniste balalarǵa táýelsiz Qazaqstannyń tabystary men elde bolyp jatqan oń ózgerister týraly baıandalady, LED-ekrandar qazaqstandyq sportshylardyń jetistikteri men respýblıkanyń Londonda ótken HHH jazǵy Olımpıada oıyndaryndaǵy asa tabysty jeńisterin kórsetedi.
Prezıdenttik shyrshadan estelik retinde árbir jas qatysýshy ózimen birge jańajyldyq fotosýretti, al jańajyldyq syılyq retinde - noýtbýk nemese Ipad-ty alyp ketedi,- dep habarlady Ǵylym jáne bilim mınıstrliginiń baspasóz qyzmeti.
