Búgin arystyqtar 100 myń teńgeden járdemaqy aldy

ARYS. QazAqparat - Búginnen bastap arystyqtar memleket tarapynan jáne qor arqyly jınalǵan qarajatty járdemaqy túrinde ala bastady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Búgin 58 myń Arys qalasynyń árbir turǵyny ózderine tıesili 100 000 teńgeni Halyq bankiniń bankomaty arqyly alyp jatyr.

Qazirgi tańda Arys qalasyndaǵy Ortalyq stadıon janyndaǵy sport mektebinde 8 bankomat ornatylǵan. Budan bólek, qalada 10 bankomat bar. Qorǵa túsken 5,8 mlrd teńgeniń 1,8 mlrd teńge somasyn qazaqstandyqtar óz kúshterimen jınaǵan bolatyn. Odan bólek, 1 mlrd teńge Túrkistan oblysy ákimdiginiń bıýdjetinen jáne 3 mlrd teńge qarajat respýblıkalyq bıýdjetten bólinip otyr.