Búgin - Arapa kúni
ASTANA. QazAqparat - Búgin, 23 qyrkúıek - Arapa kúni. Arapa kúni - Qurban aıttyń aldyndaǵy kún jáne kúnderdiń eń qadirlisi. Sol kúni jasalǵan izgi amaldardyń saýaby birneshe eselenip beriledi.
Bul kúni qajylyq paryzyn óteýge barǵan kisiler tús aýǵannan keıin erteńgi (Aıt kúni) tań namazyna deıingi aralyqta Arafat taýyna bir mezet turaqtaıdy.
Arapa arab tilindegi bilý, túsiný degen maǵynaǵa saıatyn «arafa» etistiginen shyqqan. Bul kúnniń «arapa» dep atalýynyń sebebi, zúl-hıjja aıynyń segizi kúni Ibrahım paıǵambar túsinde qurbandyqqa balasyn Ismaıyldy shalý jaıynda tús kóredi. Alǵashqyda kórgen túsin «jaı tús pe álde aıan ba» dep oılaǵan Ol ertesine (aıdyń toǵyzyna) taǵy kóredi. Osydan keıin onyń Alladan kelgen aıan ekenin biledi. Osy sebepti bul kúndi «arafa (arapa)» dep atap ketken desedi.
Arafa kúni qajylyqqa barmaǵan kisiniń oraza ustap, nápil namazdar oqyp, Alladan duǵa tileýi saýapty. Óıtkeni Sahıh Mýslımde rıýaıat etilgen bir hadıste ardaqty Paıǵambarymyz (s.a.ý): «...Arapa kúngi oraza úshin ótken jylǵy jáne keler jylǵy (eki jyldyq kishi) kúnálaryn keshirýdi Alladan úmitpen tileımin...» - dep bul kúngi orazanyń mańyzdylǵyn basa aıtqan.
Taǵy bir hadısinde: «Duǵalardyń eń qaıyrlysy - Arapa kúni jasalǵan duǵa...» - degen.
Bizdiń elde Arapa kúni osy kúnniń erteńinde bastalatyn Qurban aıt meıramyna shelpek-baýyrsaq pisirip, dastarhan ázirligi jasalyp jatady. Sonymen qosa, bir kún oraza ustaǵan da durys bolady.
