Búgin - Arafa kúni
ASTANA. 15 qarasha. QazAqparat /Gúlmıra Álıakparova/ - Búgin, 15 qarasha Zúlhıja aıynyń 9-juldyzy, ıaǵnı - Arafa kúni. Bul kúni qajylyq rásimniń eń basty sharty - Mekkeden 20 shaqyrymdaı jerdegi, Allaǵa jalbarynar kıeli oryn sanalatyn - Arafat taýynda bolý jorasy atqarylady.
Arafa - Qurban aıttan bir kún burynǵy kún. «Arafa» sóziniń maǵynasy «tanysý» degendi bildiredi. ıAǵnı, búgin adamzattyń atasy Adam (ǵ.s.) ata men Haýa (ǵ.s.) ananyń jer betine túsip, Arafat taýynda tabysqan kúni.
Astana qalasyndaǵy «Nur Astana» Ortalyq meshitiniń naıb ımamy Tólebı Ospannyń aıtýynsha, bul kúni Zúlhıja aıynyń alǵashqy kúnderinen bastap qasıetti Mekke qalasynda ıslamnyń bes qazyǵynyń biri - Qajylyq paryzdy atqaryp jatqandar úshin, Mekkeden 20 shaqyrym jerde ornalasqan Arafat taýynda bir mezet bolsa da turý paryz bolyp eseptelinedi. Qasıetti taýǵa aıaǵy tıgen ár pende Jaratqanǵa barynsha jaqyndaǵandaı, júzdeskendeı kúı keshedi. Alla taǵala da olardyń tilek-duǵalaryn qabyl alady, kúnálaryn keshiredi delinedi.
Eger kimde-kim Arafatta bir sát te turmasa, qajylyq ǵıbadatyn oryndamaǵan bolyp sanalady. Muhammed paıǵambarymyzdyń (s.ǵ.s) bir hadısinde: "Qajylyq degenimiz - Arafat. Kimde-kim Arafatqa úlgerse, qajylyqqa úlgergen bolady", delingen.
Arafa kúninen keıingi, Zúlhıja aıynyń 10-juldyzynda - Mekkege barǵan táýapshylar qajylyq paryzdyń sońǵy jorasy - Qurban aıt meıramynyń sharttaryn oryndaýǵa kirisedi. Bul kúnderi olarmen birge búkin musylman jurty Alla razylyǵy úshin qurbandyq shalady.
Sondaı-aq, Arafa kúniniń tań namazynan bastap Qurban aıttyń tórtinshi kúni ekinti namazyna deıingi 23 namaz boıy, erler men áıelder birdeı, paryz namazdardan keıin sálem bere sala «allahýmma ántassalam» demeı, ýájip bolǵan tashrıh tákbirin oqýy kerek. Tashrıh tákbiri: «Allahý ákbár, Allahý ákbár. Lá ıllaha ıllallahý ýallahý ákbár. Allahý ákbár ýá lıllahıl-hamd». Tákbir paryz namazdarynan bólek, aıt jáne juma namazdarynan keıin de oqylady.
