Búgin Almatydan Rjev qalasyna «Jeńis poıyzy» attandy
ALMATY. 7 jeltoqsan. QazAqparat /Názıra Eleýhan/- «Nur Otan» HDP Reseıdiń «Edınaıa Rossııa» saıası partııasymen birige otyryp, Uly Jeńistiń 65 jyldyǵyna oraı, 12 jeltoqsan kúni Rjev qalasynda osy aýmaqta jaýyngerlik shaıqastarǵa qatysqan ardagerlerge eskertkishtiń ashylýyna baılanysty halyqaralyq patrıottyq aktsııa ótkizedi.
Ol memorıal Elbasy Nursultan Nazarbaevtiń tapsyrmasymen salynǵan bolatyn.
Búgin tańerteń atalmysh sharaǵa oraı «Almaty-1» temirjol vokzalynda Uly Otan soǵysy ardagerlerinen quralǵan delegatsııany shyǵaryp salý men Rjev qalasyna «Jeńis poıyzyn» jóneltýdiń saltanatty rásimi bolyp ótti. Poıyz baǵyty soǵys brıgadalary qurylǵan qalalar - Almaty, Taraz, Shymkent, Qyzylorda, Aqtóbe, Oral, Reseı astanasy Máskeý boıynsha júrip, Rjev qalasynda aıaqtalady. Barlyq toqtaıtyn stansylarda saltanatty sharalar, mıtıngter, kontsertter, memlekettik organdarmen jáne JOO men mektep oqýshylarymen kezdesýler ótedi.
5 vagonnan jasaqtalǵan Jeńis poıyzymen búginde elimizdiń ár oblysynda turyp jatqan 100 jáne 101 atqyshtar brıgadasyna kirgen qazaqstandyq ardagerler, sonymen qatar, eskertkishtiń ashylýyna baratyn soǵysta qaıtys bolǵan jaýyngerlerdiń týysqandary, azamattyq qoǵam ókilderi attandy. Ardagerler soǵys júrgen jerge elimizdiń topyraǵy salynǵan kapsýlany jetkizip, ony eskertkish túbine qoıady.
Shyǵaryp salý rásiminde Almaty garnızonynyń jaýyngerleri men B.Momyshuly atyndaǵy Almaty respýblıkalyq áskerı mektep-ınternaty oqýshylarynyń qatysýymen sherý uıymdastyrylyp, ardagerler sóz sóıledi.
Shara aıasynda 11 jeltoqsan kúni Máskeýde aktsııaǵa qatysýshylar qazaqstandyq batyrlar B.Momyshuly men Á. Moldaǵulova atyndaǵy mektepterge barý, sonymen qatar Kremldiń Aleksandrov baǵynda Belgisiz soldat qabirine gúl shoǵyn qoıý rásimine qatysady.
1941-1943 jyldary Rjev qalasy mańynda bolǵan áskerı qımyldarda Kalının maıdany 39-shy armııasynyń quramyndaǵy 100 jáne 101 qazaqstandyq atqyshtar brıgadasynyń jumyldyrylǵany belgili. Áli kúnge deıin Uly Otan soǵysyndaǵy Rjev operatsııasynyń anyq-qanyǵy kópshilikke beımálim, qupııa bolyp otyr. Osy áskerı qımyldarda atalmysh brıgadalar 75 paıyzǵa deıin óz jaýyngerlerin joǵaltqan bolatyn. Urysqa kirgen 10 myń jaýyngeri bar brıgadalar alǵashqy aıda 6000-nan astam jaýyngerlerinen aıyryldy.
