Búgin Almatydaǵy álem birinshiliginde Maııa Maneza men Jazıra Japparqul synǵa túsedi
ALMATY. QazAqparat - Almatyda aýyr atletıkadan dúbirli doda jalǵasyp jatyr. Búgin, ıaǵnı qarashanyń 14-i kúni túski saǵat 16:00-de 69 keli salmaq sanatynda «A» tobynda sharshy alańǵa Olımpıada chempıony Maııa Maneza men Jastar arasynda Álem chempıony atanǵan Jazıra Japparqul shyǵady.
Keshki 19:00-de 94 keli salmaq sanatynda «A» tobynda qazaqstandyq Sedov Vladımır kúshin synamaq.
Sondaı-aq keshki 21:00-de 75 keli salmaq sanatynda «S» tobynyń ziltemirshi názik jandylary eń úzdikti anyqtaıdy.
Tepse temir úzetin erler arasyndaǵy doda tańǵy saǵat 9:00-de bastalady.
Jankúıerler 105 keli salmaq sanatyndaǵy «D» tobynyń, 11:00-de 105 keli «S» tobynyń sportshylarynyń múmkindigin baqylaıdy.
Túski 14:00-de 94 keli salmaq sanatynda «V» tobynyń erleri jarystyń kórigin qyzdyrady.
Álemniń kil myqtylary baq synap jatqan baıraqty básekede qazaqstandyqtar namysqa tyrysyp baǵýda. Keshe qazaqstandyq sportshy 63 keli salmaq sanatynda óner kórsetken Karına Gorıcheva 246 (113+133) upaımen jalpy esepte altynshy orynǵa turaqtasa, julqa kóterýde 113 kelini baǵyndyryp, kúmis júldeni ıelendi. Qarashanyń 12-sinde Gúlnaz Naýryzova 63 kelige deıingi salmaq sanatynda «S» tobynda ekinshi orynǵa turaqtady. Qossaıystyń nátıjesinde qazaqstandyq sportshy 196 upaıdy ıelendi (91+105). Al 77 kelige deıin salmaq sanaty boıynsha óner kórsetken aýyr atlet Kırıll Pavlov qossaıysta 352 upaı jınap, óz tobynda tórtinshi oryndy mise tutty.
Buǵan deıin Olımpıada chempıony Zúlfııa Chınshanlo álem chempıony atalyp, óziniń serpe kóterýdegi rekordyn jańartqan bolatyn. Al erler arasynda óner kórsetken 18 jasar Albert Lınder 10-shy orynǵa turaqtady.
Saıystyń alǵashqy kúni jarys jolyna shyqqan Arlı Chonteı altynshy orynmen ǵana qanaǵattansa, qyzdar arasynan Margarıta Elıseeva alǵashqy aınalymnan asa almady.
Eske sala keteıik, baıraqty básekede 72 elden 538 sportshy baqtaryn synaýda. Onyń 315-i erler bolsa, 223-i áıelder. Áıelder jeti salmaq dárejesi boıynsha (48, 53, 58, 63, 69, 75, +75 keli) synǵa tússe, erler segiz salmaqta (56, 62, 69, 77, 85, 94, 105, +105) jeńimpazdar men júldegerlerdi anyqtaıtyn bolady. Qazaqstan quramasy bul dodaǵa tolyq quramda qatysyp otyr.
