Búgin Almatyda Uly Otan soǵysy men eńbek ardagerlerin ulyqtaýǵa arnalǵan birneshe sharalar ótti
ALMATY. 5 mamyr. QazAqparat /Názıra Eleýhan/ - Búgin Almaty qalasynyń Almaly aýdany ákimdigi aýdan mekemeleriniń qoldaýymen Uly Otan soǵysy men eńbek ardagerlerin qurmetteýge arnalǵan birneshe sharalar ótkizdi.
Barlyq sharalar bir ýaqytta aýdannyń 8 meıramhanalarynda ótti. Saltanatty sharada aýdan ákimi Marat Pirimbekov pen ákimdiktiń ókilderi ardagerlerdi 9 Mamyr - Uly Jeńis kúnimen quttyqtap, óz tilekterin bildirdi.
«Adamzat keńes jaýyngerleriniń júrek jutqan qaısar rýhynyń arqasynda dúnıeni jalmap qoımaq bolǵan fashızm indetinen aman qaldy. Ómirge qushtar mıllıondaǵan jas, ári jasampaz júrekti qyrshynynan qıǵan, sonshama otbasyna orny tolmas qaıǵy-qasiret ákelgen soǵys apatynyń sabaǵy eshqashanda umytylmaýy tıis», - dep atap ótildi shara barysynda.
Ardagerlerge aýdannyń shyǵarmashylyq ujymdary men qatar, T.Júrgenov atyndaǵy Óner akademııasy, A.Jubanov atyndaǵy mýzyka mektebi men P.Chaıkovskıı atyndaǵy mýzykalyq kolledj stýdentteri arnaıy daıyndaǵan kontserttik baǵdarlamalaryn usyndy.
Búginde Almaly aýdanynda 233 Uly Otan soǵysyna qatysýshy men 124 múgedek jandar turady.
Búgin sonymen qatar, aýdannyń barlyq bilim mekemelerinde patrıottyq kontserttik baǵdarlamalar, erlik sabaqtary, Uly Otan soǵysy ardagerleri men tyl maıdanyna qatysýshylarmen kezdesýler ótýde. Sondaı-aq, aýdan uıymdary da quttyqtaý sharalaryn ótkizip, syı-qurmet kórsetýde.
Búgin Ál-Farabı atyndaǵy QazUÝ de Jeńis kúnine oraı, Uly Otan soǵysy ardagerlerine arnalǵan merekelik saltanatty is-shara ótkizdi. Oǵan ýnıversıtet rektory Ǵalymqaıyr Mutanov qatysyp, ardagerlerdi kele jatqan merekemen quttyqtady. Ardagerlerdiń qurmetine merekelik kontsert uıymdastyrylyp, dastarhan jaıyldy. Shara barysynda ardagerlerge gúl shoqtary men arnaıy daıyndalǵan syılyqtar tabystaldy.
