Búgin Almatyda musylman qoljazbalary men artefaktilerdi saqtaý men qalpyna keltirý máseleleri talqylandy
ALMATY. 21 Jeltoqsan. QazAqparat /Názıra Eleýhan/ - Búgin Almatyda Ulttyq kitaphanada musylman qoljazbalary men artefaktilerin jınaqtaý, saqtaý men qalpyna keltirý jónindegi mamandardyń aımaqtyq kezdesýi bolyp ótti.
«Kezdesýdiń maqsaty - musylman qoljazbalaryn zertteý jóninde tájirıbe almasý, qazaqstandyq jáne mamandanǵan mekemeler arasyndaǵy áriptestik sheńberin keńeıtý jáne sondaı-aq osy máselemen aınalysatyn sheteldik ortalyqtarmen qarym-qatynasty jandandyrý bolyp tabylady», - dedi R.B.Súleımenov atyndaǵy Shyǵystaný ınstıtýtynyń dırektory, tarıh ǵylymdarynyń doktory, professor Merýert Ábýseıitova.
Onyń aıtýynsha, Qazaqstan táýelsizdik alýymen musylman eskertkishterin anyqtaý, zertteý, sanaqqa alý jáne nasıhattaý sekildi jumystar jandana túsken. «Sondyqtan qazirgi ýaqytta ǵylymı jáne praktıkalyq máni bar eń ózekti másele týyndap otyr, ol - tikeleı ulttyq kadrlerdi daıyndaıtyn musylman qoljazbalarynyń jalpyulttyq ortaq qoryn qurý máselesi. Elimizde asa qundy maǵlumattardy, qoljazbalardy saqtaıtyn biryńǵaı baza bolatyn Qazaqstandyq ortalyq qurý qajet», - dedi Merýert Ábýseıitova.
Kezdesýge qatysqan mamandardyń pikirinshe, Qazaqstan men Ortalyq Azııa ǵasyrlar boıy ıslam órkenıetiniń qalyptasýy men damýyna qomaqty úles qosyp keledi. «Oǵan memlekettik qorlar men jeke qorlarda saqtalǵan arab jazýymen jazylǵan qomaqty mólsherdegi asa qundy jazbalar basty dálel bola alady», - dedi mamandar. Olardyń aıtýynsha, qazaq, shaǵataı, túrik, arab jáne parsy tilderinde jazylǵan bul qoljazba eskertkishterde Ortalyq Azııa aımaǵynyń tarıhy men mádenıetine qatysty asa qundy maǵlumattar saqtalǵan.
