Búgin Almatyda «Ekrandaǵy zorlyq-zombylyqty toqtataıyq» atty qoǵamdyq tyńdaý ótti
ALMATY. Naýryzdyń 17-si. QazAqparat /Názıra Eleýhan/ - Zorlyq-zombylyq, qysym kórsetýshilik, seksýaldy mazmundaǵy fılmder men baǵdarlamalar kórsetetin, ásirese senbi, jeksenbi kúnderi «1000 TV», Ren TV arnalaryn kabeldi TV provaıderleriniń qosymsha paketine aýdarý kerek, al qazaqstandyq NTK jáne 31-shi telearnalar óz kórsetilimderi baǵdarlamasyn qaıtadan qarap shyǵýlary kerek.
Barlyq telearnalarǵa balalar kóretin saǵat 6-dan 10-ǵa deıingi ýaqytqa zorlyq-zombylyq mazmundaǵy barlyq baǵdarlamalarǵa shekteý qoıý kerek. Bul týraly búgin Almatyda «Ekrandaǵy zorlyq-zombylyqty toqtataıyq» atty qoǵamdyq tyńdaý jumysy barysynda Qazaqstandaǵy «Daǵdarystyq ortalyqtar odaǵynyń» ZTB tóraıymy Zúlfııa Baısaqova málimdedi, dep habarlaıdy QazAqparat.
Onyń aıtýynsha, kógildir ekrandaǵy zorlyq-zombylyqty toqtatý úshin zańdyq turǵyda retteý kerek. «NTK, 31-shi telearnalary reseılik beıádep habarlardy toqtatyp, olardyń ornyn ózimizdiń otandyq ınabatty baǵdarlamalarmyn toltyrsa durys bolar edi. Habarlarda, ásirese jańalyqtarda adamnyń máıitterin, kesilgen aıaq- qoldardy kórsetpeý kerek, ondaı sıýjetterdi balalar aýyr qabyldaıdy», dep atap ótti jıyn barysynda Zúlfııa Baısaqova. Onyń aıtýynsha, balalarǵa qandaı habardy kórý kerek, ony qalaı qabyldaý kerek dep túsindiretin medıa bilim berilmeıdi. «Sondyqtan balalar ekrandaǵy barlyq kórinisti qaz qalpynda qabyldaıdy», dedi ol.
Jıyn barysynda aqpannyń 8-nen naýryzdyń 8-ne deıin júrgizilgen aktsııanyń qorytyndysy jarııalanyp, teledıdar baǵdarlamalaryndaǵy, fılmderdegi jáne basqa da beıne materıaldardaǵy zorlyq-zombylyq kórinisterdiń balalardyń psıhıkalyq damýyna áseri saralanyp talqylandy. Tyńdaý sońynda, qatysýshylar birqatar naqty usynystaryn bildirdi.
Qazaqstandaǵy «Daǵdarystyq ortalyqtar odaǵynyń» ZTB tóraıymy Zúlfııa Baısaqovanyń aıtýynsha, aktsııa barysynda 53 adam telefon soqqan. Búgingi otyrystan keıin bul másele sheshimin tabady degen úmittemin», dedi Zúlfııa Baısaqova.
