Búgin Almatyda baıkerlik maýsym ashyldy - FOTO
ALMATY. QazAqparat- Búgin Almaty qalasynda, Qazaqstan halqynyń birligi kúni, 2014 jyldyń baıkerlik maýsymy ashyldy.
Bıylǵy jyldyń jańa maýsymyn asha otyryp, MCC-Motors moto klýbynyń prezıdenti Leonıd Gýlkovskıı: «Mine, bıylǵy maýsym da kelip jetti. Bizge qoldaý kórsetkeni úshin Almaty qalasynyń ákimdigine alǵysymyzdy bildiremiz. Bizdiń búgingi sharaǵa Almaty qalasynyń ǵana emes, sondaı-aq Almaty oblysynyń baıkerleri de keldi. Aramyzda astanalyq baıkerler de bar. Barlyǵy myńnan astam baıker jınaldy. Bıylǵy maýsymnyń bir erekshelegi - onyń ashylý saltanatyna aty ańyzǵa aınalǵan máskeýlik stantraıder, motokaskader Marat Kankadze kelip otyr», - dedi.
«Atakent» kórme kesheninde ótken sharada, kelýshiler nazaryna mototsıklderdiń alýan túri usynyldy. Olardyń ishinde strıtbaık, sportbaık, chopper, kross sekildi mototsıklder de bar.
Baıkerlik maýsymnyń ashylý saltanatynan keıin ár túrli saıystar uıymdastyryldy.
Óz isiniń has sheberleri stant-shoý, moto-djımhana sekildi synaqtar boıynsha jarysyp, jurtshylyqty tánti etti.
Esterińizge sala keteıik, stant-shoý - mototsıkldi ústinde turyp aıdaý, al moto-djımhana - kedergilerden barynsha tez oraǵytyp ótý.
