Búgin Almatyda «Balalyq shaq -2011» halyqaralyq kórmesi ashyldy
ALMATY. 8 qyrkúıek. QazAqparat /Názıra Eleýhan/ - Búgin Almatydaǵy Balýan Sholaq atyndaǵy sport kesheninde tórtinshi halyqaralyq «Balalyq shaq-2011» atty balalarǵa arnalǵan taýar kórmesi ashyldy.
«Alexpo» kompanııasynyń uıymdastyrýymen ashylǵan kórmege qazaqstandyq kompanııalar, sonymen qatar Reseı, Ýkraına, Lıtva, Germanııa, Qytaı jáne taǵy da basqa jaqyn jáne alys shet elderdiń balalarǵa arnalǵan taýarlardy shyǵaratyn jáne satýmen aınalysatyn jetekshi kásiporyndary qatysýda. Kórmege túrli oıynshyqtar, balalar kıimderi men aıaq kıimderi, kitaptar men dıskiler, bala taǵamdary, keńse taýarlary, balalarǵa arnalǵan jıhazdar jáne taǵy da basqa balalarǵa qajetti taýarlar qoıylǵan.
"Kórmeniń basty maqsaty - balalar taýarlary naryǵyn damytý jáne júıelendirý, sonymen qatar tutynýshyǵa balalar taýarlary týraly maǵlumat berý bolyp tabylady. Bul halyqaralyq shara Qazaqstan bıznesiniń túrli salalardaǵy baılanysyn keńeıtýge, shetel kompanııalarymen áriptestikti nyǵaıtýǵa jáne balalar taýarlary salasyn damytýǵa yqpal etetinine senemin",-dedi atalmysh sharanyń uıymdastyrýshysy, "Alexpo"kórme kompanııasynyń Bas dırektory Darıa Gaıdenraıh kórmeniń ashylý saltanatynda.
Onyń aıtýynsha, kelesi «Balalyq shaq-2012» kórme Astana qalasynda sáýir aıynda ótetin bolady.
Kórme barysynda jańa ónimderdiń tusaýkeserleri men taqyryptyq semınarlar, konferentsııalar, sonymen qatar, "Kınderfest" festıvali ótkiziletin bolady.
Bunymen qatar, kórme barysynda Profılaktıkalyq medıtsına Akademııasyna qarasty Salaýatty tamaqtaný ortalyǵynyń mamandary durys tamaqtaný suraqtary boıynsha aqysyz keńes beretin bolady. Naqtyraq aıtqanda, úsh kún boıy mamandar analarǵa, balalarǵa, júkti jáne emizetin áıelderge tıimsiz tamaqtanýdyń saldarynan damıtyn jáne balalar arasynda kóp taraǵan asqazan-ishek joldarynyń aýrýlary, taǵamdyq allergııa, temir tapshylyq anemııa, ıod tapshylyq jaǵdaı, avıtamınoz jáne gıpovıtamınozdyq jaǵdaılar boıynsha naqty usynystar men keńester beretin bolady.
Kelýshiler atalmysh kórmemen qatar, osy kórme aıasynda ashylǵan "Syılyqtar" jáne "Keńse taýarlary" kórmesin tamashalaı alady.
Halyqaralyq kórme QR Bilim mınıstrliginiń, qala ákimdiginiń jáne Qazaqstan Balalar taýarlaryn shyǵarýshylar qaýymdastyǵynyń qoldaýymen ótýde.
Kórmeler qyrkúıektiń 10-yna deıin jalǵasady.
