Búgin Almatyda aýa temperatýrasy + 35 gradýsqa deıin kóteriledi
ALMATY. QazAqparat - Sınoptıkter 7 qyrkúıekte Almaty qalasynda kún ysyp, synap baǵanasy 35 gradýsqa deıin kóteriletinin málim etti, dep habarlaıdy QazAqparat.
Osyǵan baılanysty Almaty qalalyq tótenshe jaǵdaılar departamenti qala turǵyndary men qonaqtaryn taýly-ormandy jerlerde ashyq otty paıdalaný, ot jaǵý, qurǵaq jáne orylǵan shópti órteý qaýipti ekenin eskertti.
«Esterińizge salaıyq, erekshe qorǵalatyn tabıǵı aýmaqtarda jáne belgilenbegen jerlerde ot jaqqany úshin, orman sharýashylyǵy mekemeleriniń qyzmetkerleri «Ákimshilik quqyq buzýshylyq týraly» kodekstiń 367-baby boıynsha ákimshilik aıyppul salýǵa ýákiletti.
Jeke tulǵalarǵa salynatyn aıyppul somasy 10-nan 100 aılyq esep kórsetkishke deıin belgilengen, ıaǵnı, 30 myń 630 teńgeden bastap 306 myń 300 teńge deıin jetedi. Órttiń zardaby aýyr bolsa kináliler qylmystyq jaýapqa tartylýy da múmkin», - dep eskertti qalalyq TJD ókilderi.
Eske salaıyq, búgin Almatyda Kóktóbeden órt shyǵyp, ol saǵat 20:35-de ór t tolyq sóndirilgenin habarlaǵanbyz.
Sondaı-aq, jelide Almatyda aǵashtardy órtep jatqan adamnyń vıdeosy taraǵan bolatyn. Almaty polıtsııasynyń habarlaýynsha, aǵashtardy órtep jatqan adamnyń vıdeosy túsirilgen jer anyqtaldy. Qazir bul oqıǵa boıynsha tekserý jumystary bastaldy.
