Búgin Almatyda 49 saýda marketi, 44 janarmaı quıý stantsııasy jumysyn bastady
ALMATY. QazAqparat – Almaty qalasynda iri saýda marketteri, bazar, janarmaı quıý stantsııalarynyń jumysy jandanýda, dep habarlaıdy QazAqparat tilshisi.
Qalalyq kásipkerlik jáne ınvestıtsııa basqarmasynyń málimetinshe, 8 qańtardan bastap «Toımart», «Magnum» jáne «Small» syndy iri saýda marketteriniń 28 bólimshesi qaıta ashylǵan. Búgin taǵy 49 fılıal ashylyp, turǵyndarǵa qyzmet kórsetip jatyr. Azyq-túlik qory jetkilikti.
Sonymen qatar azyq-túlik ónerkásibi salasyndaǵy Aqsaı NAN, Almaty ashytqy zaýyty iri kásiporyndar jumysyn jandandyrdy. Sondaı-aq búginnen bastap 44 janarmaı quıý stantsııasy ashyldy, erteń taǵy 25-i iske qosylmaq.
