Búgin Almaty oqýshylary men jas sýretshiler Uly Otan soǵysynyń ardagerlerin ulyqtady
Atalmysh shara oqýshylardyń ardagerlerge arnaǵan quttyqtaýymen bastaldy. Olar sharaǵa arnaıy shaqyrylǵan Uly Otan soǵysy ardagerlerin kele jatqan merekemen quttyqtap, daıyndaǵan syılyqtary men gúl shoqtaryn tabys etti. Oqýshylar ardagerlerdiń óz aýyzdarynan Uly Otan soǵysyna qatysýshy qazaqstandyqtardyń erligin surap, bile aldy. Óz kezeginde, ardagerler de oqýshylarmen Uly Otan soǵysy jaıyndaǵy estelikterimen bólisti. "Bul soǵysty eske alǵanda, júregim aýyrady, kózime jas keledi. Sum soǵys qanshama adamnyń ómirin jalmady, qanshama bala jetim qaldy, qansha adam qaıǵy jutty, soǵystyń ushqyny ár otbasynyń basyna tımeı ótken joq. Sender mundaı azapty kúnderdi kórmegen baqytty balalarsyńdar, sony baǵalap, el úshin, Otan úshin adal qyzmet etetin jaqsy azamat bolyp ósińder! Elimizde láıim osyndaı beıbit ómir, bereke-birlik, tynyshtyq bola bersin!", - dedi Uly Otan soǵysynyń ardegeri Káken Ábenov.
Kezdesý barysynda ardagerlerge Almaty qalasynyń jas sýretshileri men «Georgıı Halanskıı stýdııasynyń» tárbıelenýshileri qoldarynan shyqqan portretterdi saltanatty túrde tabystaý rásimi bolyp ótti. Almaty ardagerleriniń sýretteri salynǵan bul týyndylar "Batyrlar portretteri" jobasy aıasynda salynǵan. «Atalmysh joba men búgingi shara jastar arasynda áskerı-patrıottyq rýhty qalyptastyrýǵa, oqýshylardyń Uly Otan soǵysy tarıhyna qyzyǵýshylyǵyn oıatýǵa, sonymen qatar, qazaqstandyq ardagerlerdiń erligin pash etýge, qurmetteı bilýge shaqyrýǵa baǵyttalǵan», - dedi Tuńǵysh Prezıdent qorynyń oryndaýshy dırektory Bektas Muhamedjanov.
Shara barysynda sonymen qatar, Tuńǵysh Prezıdent qorynyń bastamasymen basylyp shyqqan «Barlyq urpaqtyń esinde» atty fotoalbomdar men ardager Káken Ábenovtyń «Meniń ómirimdegi Uly Otan soǵysy: 60 jyldan soń» atty kitaby jáne Orynǵalı Esenǵazıevtiń «Uly otan soǵysy: kombattyń taǵdyry» atty monografııalary sharaǵa qatysýshylarǵa tabys etildi.
Shara sońynda fotokórme men qylqalam sheberleriniń Jeńis kúnine arnalǵan kórmesi ashyldy.
