Búgin álemdegi perınataldy ortalyqtar kúlgin túspen jaryqtandyrylady
17 qarasha – Halyqaralyq shala týǵan balalar kúni. SQO perınataldy ortalyǵy mamandarynyń pikirinshe, bul kúndi atap ótý qajet. Óıtkeni shala týǵan sábılerdi kútip, qatarǵa qosýdyń kóp qıyndyǵy bar.
«Nelikten bul kúndi atap ótedi? Maqsat – jurtshylyqtyń nazaryn osy máselege aýdarý. Statıstıkaǵa súıensek, álemde jyl saıyn 15 mln bala shala týady eken. Biraq sonyń úshten biri ǵana úsh jasqa deıin jetedi. Aýrýhanadan shyǵarǵannan keıin de bul balalar baqylaýda bolady.
Bizdiń perınataldy ortalyqta 500 grammǵa deıingi salmaqta 3 bala ómirge keldi. Eki qyz jáne ul bala. Olardy aman alyp qala aldyq. Qazir olar 2,5 jáne 3 jasta. Aman-esen ósip keledi», - deıdi oblystyq perınataldy ortalyqtyń neonatologııa bólimshesiniń úılestirýshisi Natalıa Salohına.
Petropavldaǵy perınataldy ortalyq elimizde alǵashqylardyń biri bolyp 1991 jyly ashyldy. Qazir munda birneshe bólimshe bar, sonyń biri shala týǵan sábılerge arnalǵan.
Mamandardyń aıtýynsha, ashylǵannan beri jansaqtaý bólimshesinde merziminen buryn dúnıege kelgen 2270 bala em alǵan. Sonyń ishinde 290 shaqalaqtyń dene salmaǵy ekstremaldy kishkentaı bolǵan.
«Ekstremaldy dene salmaǵy dep – salmaǵy 1 kg deıingi balalardy aıtamyz. Olar anasynyń qursaǵynda jatyp, áli de damýy kerek edi, biraq bir sebeptermen erte dúnıege kelgender. Mundaı shaqalaqtar ózdiginen dem ala almaıdy. Mamandarymyz olardyń jetilýine qajet bar jaǵdaıdy jasaıdy, ókpeni jasandy jeldetý apparatyna qosady, ınkýbatorǵa ornalastyrady. Ol jerde belgili bir temperatýra men ylǵaldylyq bolýy tıis. Bizdiń dárigerler men medbıbilerdiń jumysy ońaı emes, olar kúndelikti bul kórsetkishterdi baqylap otyrady», - deıdi Natalıa Salohına.
Jaqynda merekege oraı ortalyq «Meniń qalaı óskenimdi kórset» atty aktsııa uıymdastyrdy.
«Biz bul aktsııaǵa sonshama kóp adam qatysady dep kútpegen edik. Analar balalarynyń sýretterin jarııalap, bizdiń medıtsınalyq qyzmetkerlerge alǵystaryn aıtyp jatyr. Eń bastysy ananyń durys oılaýy, pozıtıvti kózqarasy. Sonda ǵana nátıje kútýge bolady.
Jalpy, bala súıgisi keletin jup, deni saý urpaqty ómirge ákelýi úshin aldymen óz densaýlyqtaryn durystaǵandary jón. ıAǵnı jaýapkershilik bolýy tıis. Merziminde tekseristen ótip turý, dárigerdiń keńesine qulaq asý», - dáriger.
Bıyl SQO-da salmaǵy 1,5 kelige deıin salmaqpen 56 sábı dúnıege keldi.
«Balanyń kúni jetpeı ómirge kelýiniń birneshe sebebi bar. Onyń 30% ananyń densaýlyǵyna baılanysty. Áıelde qan qysymy joǵary bolsa, sozylmaly aýrýlary, qant dıabeti bolsa erte bosanýy múmkin. Keıbiri ekiqabat kezinde aýrýǵa ushyraýy múmkin. Óıtkeni áıeldiń aǵzasy júktilik kezinde eki adam úshin jumys isteıdi», - Natalıa Salohına.
Jalpy bul kúni álemdegi barlyq perınataldy ortalyq kúlgin túspen jaryqtandyrylady. Bul tús arnaıy shala týǵan sábılerdiń túsi retinde tańdap alynǵan. Oblystyq perınataldy ortalyq ta bul aktsııaǵa qosylmaq.