Búgin álem elderi qaýipsiz ınternet kúnin atap ótedi
ASTANA. QazAqparat - 11 aqpan kúni álemniń kóptegen elderinde «Paıdaly ǵalamtordy birge jasaıyq!» uranymen Halyqaralyq qaýipsiz ınternet kúni atap ótiledi, dep jazady ITAR-TASS.
Bul halyqaralyq aıtýly kún balalar men eresekterdiń jelidegi qaýipsizdiginiń qamtamasyz etilýi máselelerine kóńil bólýdi jáne onlaın-ortada etıkaly minez-qulyqty qalyptastyrýdy kózdeıdi.
Aıryqsha merekeni Eýropalyq komıssııanyń «Qaýipsiz ınternet» baǵdarlamasynyń aıasynda jumys jasaıtyn Insafe qaýipsiz ınternet ortalyqtarynyń eýropalyq jelisi 2004 jyldan beri uıymdastyryp keledi. Qazir qaýipsiz ınternet kúnin álemniń 110-nan astam elderinde atap ótedi. Ol úshin ǵalamtor jelisin paıdalanýshylarynyń qorǵalýyn arttyrýǵa baǵyttalǵan myńdaǵan sharalar ótkiziledi.
Atalmysh merekeniń resmı saıtynda «2014 jyldyń urany sandyq qoǵamda tolyqqandy ári úılesimdi tulǵany qalyptastyrýda oń baǵyttaǵy jáne damytýshy ınternet-servısterdiń rólin arttyrýdyń basymdylyǵyn kórsetedi», - delingen.
