Búgin AQSh-ta Prezıdentter kúni atap ótilmek
ASTANA. QazAqparat - Búgin AQSh-ta Prezıdentter kúni atap ótiledi. Bul ulttyq patrıottyq mereke osy el tarıhyna ólsheýsiz úles qosqan Amerıkanyń qos prezıdenti Djordj Vashıngton men Avraam Lınkolndi eske alý qurmetine arnalǵan, dep jazady ITAR-TASS.
Bul amerıkandyqtardyń erteden toılanyp kele jatqan merekeleriniń biri. Onyń tarıhy 1782 jyldan bastaý alady. Dál sol jyly Vırdjınııa shtatyndaǵy Rıchmond qalasynda 1732 jyldyń 22 aqpanynda dúnıege kelgen Djordj Vashıngtonnyń týǵan kúnin kópshilik tuńǵysh ret atap ótken bolatyn. Jyldar óte kele, Rıchmondtaǵy bul baldarmen, sherýlermen, merekelik as berýmen ótetin dástúr birtindep el aýmaǵyna taraldy. 1885 jyly 22 aqpan Vashıngton kúni degen ataýǵa ıe bolǵan ulttyq mereke retinde jarııalandy.
Amerıkandyqtar 1809 jyldyń 12 aqpanynda dúnıe esigin ashqan Avraam Lınkolndi de qatty qadir tutatyndyqtan, 1970 jyldary osy eki aıtýly datany biriktirip, aqpan aıynyń úshinshi dúısenbisin Prezıdentter kúni retinde atap ótý qolǵa alyndy. Prezıdent Rıchard Nıkson dál osy kúni AQSh-tyń barlyq prezıdentterin eske alýdy usyndy, sondyqtan bul eldiń anyqtamalyqtarynda atalmysh mereke Vashıngtonnyń jáne Lınkolnniń týǵan kúnderi jáne Prezıdentter kúni retinde kórsetilgen.
AQSh-ta bul kún resmı túrde demalys kúni dep jarııalanǵan, barlyq memlekettik mekemeler, poshta bólimsheleri, bankterdiń basym bóligi, mektepter, kitaphanalar men tipti, áıgili Nıý-Iork bırjasy da demalady.
Bul kúni qala saıabaqtarynda kontsertter men shoý baǵdarlamalar kórsetilse, Maýnt-Vernondaǵy Vashıngtonnyń murajaıynda áıgili saıasatker týraly sahnalanǵan kórinister kópshilik nazaryna usynylady. Al, AQSh-tyń tuńǵysh prezıdentiniń qurmetine atalǵan qalada jurtshylyq Djordj Vashıngton men Avraam Lınkolnniń monýmentterine gúl shoqtaryn qoıady.
