Búgin - Aqseleý Seıdimbektiń týǵan kúni

Ol 1942 jylǵy jeltoqsannyń 12-si kúni Qaraǵandy oblysynyń Jańaarqa aýdanynda dúnıege kelip, 2009 jyly qyrkúıektiń 16-sy kúni 67 jasqa qaraǵan shaǵynda Astana qalasynda máńgilik saparǵa attanǵan bolatyn. Qazaq ádebıeti men mádenıetine ólsheýsiz úles qosqan ǵalym-etnograf 2000 jyldan bastap ómiriniń sońyna deıin elordadaǵy Lev Gýmılev atyndaǵy Eýrazııa ulttyq ýnıversıtetinde ustazdyq etti, dep habarlaıdy QazAqparat.

Aqseleý Seıdimbek Almatydaǵy Qazaq memlekettik ýnıversıtetiniń jýrnalıstıka fakýltetin támamdaǵan soń, respýblıkalyq «Lenınshil jas» (qazirgi «Jas Alash»), Qaraǵandy oblystyq «Ortalyq Qazaqstan», «Sotsıalıstik Qazaqstan» (qazirgi jalpyulttyq «Egemen Qazaqstan») gazetterinde, sondaı-aq túgel elge taraǵan «Zerde» jýrnaly men «Álem» almanaǵynda jumys istegen bolatyn. Odan keıin Muhtar Áýezov atyndaǵy Ádebıet jáne óner ınstıtýtynda Qoljazba bóliminiń meńgerýshisi, Ybyraı Altynsarın atyndaǵy bilim ınstıtýtynyń dırektory, Qazaq Bilim akademııasynyń prezıdenti, QR Prezıdenttik Mádenı ortalyǵy dırektorynyń ǵylym jónindegi orynbasary qyzmetterin atqarǵan edi.

Aqseleý Slanuly 1998 jyly folklor salasy boıynsha «Qazaqtyń kúı ańyzdary» degen taqyryptaǵy zertteýleri úshin fılologııa ǵylymdarynyń doktory dárejesi, al 2003 jyly ádebıettaný salasynyń professory dárejesi berildi. Otyzǵa tarta kórkem, ǵylymı-kópshilik, monografııalyq kitaptardyń avtory. Shyǵarmalary onnan astam shetel tilderine aýdarylǵan. Ol - Memlekettik syılyqtyń ıegeri, Qazaqstannyń eńbek sińirgen qaıratkeri, fılologııa ǵylymynyń doktory, professor. «Qurmet» ordeniniń ıegeri.