Búgin aqpannyń 14-inen 15-ine qaraǵan túni - Muhammed (s.ǵ.s) paıǵambarymyzdyń týylǵan kúni

Ádettegideı bıyl da álemniń kóptegen elderi hazreti Muhammed (s.ǵ.s) paıǵambarymyzdyń máýlitin atap ótedi. Paıǵambarymyzdyń (s.ǵ.s.) týylǵan kúnin qasıetti mereke retinde atap ótý úrdisi ıslam áleminde hıjrı IV-V ǵasyrlardan bastalady. Islam ǵulamalary bul jaıly kóptegen qundy eńbekter jazyp, máýlittiń dinimizdegi ornyn anyqtaýǵa tyrysqan. Qazirgi tańda bul meıramdy bir-eki memleketten ózge barlyq ıslam álemi erekshe merekeleıdi.

Máýlit - arab sózi, qazaq tilinde «týǵan kún» degen maǵyna beredi. Bul Alla taǵalanyń eń súıikti pendesi, Adam atadan (ǵ.s.) bastalǵan paıǵambarlardyń sońǵysy, ári sardary hazreti Muhammedtiń (s.ǵ.s.) dúnıege kelgen aıyna ataý etip qoıylǵan sóz. Qasıetti Quran Kárimde Alla taǵala «Ahzab» súresiniń 56-aıatynda: «Paıǵambarǵa (s.ǵ.s.) Alla rahymyn tógip, perishteler jarylqaý tileıdi. Eı, múminder! Paıǵambarǵa (s.ǵ.s.) sender de salaýat aıtyp, sálem joldańdar», - degen. Sondyqtan da ár jyly aı tizbesiniń rabıǵýl-áýýál aıynda áz Paıǵambarymyzdyń máýlitin merekelep, Alla taǵala bizdi óziniń súıikti paıǵambary hazreti Muhammedtiń (s.ǵ.s.) úmmeti etip jaratqanyna alǵysymyzdy bildirip, súıikti habıbine jamaǵat bolyp salaýattar aıtamyz.

Búgin sondaı-aq, dúnıejúzi jastarynyń, sonyń ishinde qazaqstandyqtardyń «mahabbat kúni» dep qushyrlana toılaıtyn - áýlıe Valentın kúni. Katolık shirkeýi qyzmetkeriniń jazaǵa tartylǵan kúnin atap ótýdi dástúrge aınaldyrǵan kópqudaıshylardyń oılap tapqan bul jalǵyz «meıramy» emes. Qazirgi kúni záre-qutyńdy qashyratyn «Helýeın» de býyny qataımaǵan jastarymyz arasynda tym tanymal. Bozókpelerdi qolpashtap, bulardy atap ótýge jaǵdaı jasap berip jatqan eresekter de barshylyq. Al Muhammed (s.ǵ.s) paıǵambarymyzdyń mýáliti men salaýattylyq pen tárbıege úndeıtin ózge de dinı meıramdar, ókinishke qaraı, jyl ótken saıyn yntyzarlyq pen qumarlyqty qozdyratyn osyndaı «merekelerdiń» tasasynda qalyp barady.

Eliktegish qasıetten arylyp, ata-babamyzdyń mańdaı terimen qolymyzǵa tıgen táýelsizdik zamanynda dilimiz ben dinimizge jat dúnıelerdiń ara-jigin ajyratatyn kez jetken sııaqty.