Búgin 7-nshi qysqy Azııa oıyndarynyń ánuranyna jarııalanǵan baıqaýdyń jeńimpazy anyqtalady
ASTANA. 7 jeltoqsan. QazAqparat /Arman Asqarov/ - Búgin, jeltoqsannyń 7-si kúni keshke deıin 7-nshi qysqy Azııa oıyndarynyń ánuranyna jarııalanǵan baıqaý komıssııasynyń qorytyndysy jarııalanyp,
atalǵan konkýrsta jeńimpaz atanǵan azamattyń esimi belgili bolmaq. Bul týraly búgingi on-laın konferentsııasy barysynda QR Týrızm jáne sport vıtse-mınıstri Qaıyrbek Óskenbaev málim etti.
Onyń habarlaýynsha, 7-nshi qysqy Azııa oıyndarynyń ánuranyna jarııalanǵan baıqaý komıssııasy Azıadaǵa daıyndyq jónindegi dırektsııanyń negizinde qurylǵan. «Sondyqtan baıqaýdyń qorytyndysyn dırektsııadan nemese Azıadanyń resmı saıtynan bilýge bolady», - deıdi Q.Óskenbaev.
Aıta keteıik, baıqaý tamyz aıynyń 24-i kúni jarııalanǵan edi. Konkýrsqa qatysýshylardyń ótinishteri qazannyń 10-y kúni aıaqtaldy. Jalpy, baıqaýǵa Qazaqstan aýmaǵynda turatyn kez kelgen azamattyń qatysýǵa múmkindigi boldy. Elimizge tanymal 8 ánshi-kompozıtordan turatyn ádilqazylar alqasyn «7-nshi qysqy Azııa oıyndaryn uıymdastyrý komıtetiniń atqarýshy dırektsııasy» AQ prezıdenti Anatóli Qulnazarov basqarady.
