Búgin 3,6 mln oqýshy úshin sońǵy qońyraý soǵyldy

NUR-SULTAN. QazAqparat - Bilim jáne ǵylym mınıstri Ashat Aımaǵambetov Nur-Sultan qalasyndaǵy №75 mektep-gımnazııasyna baryp, sońǵy qońyraý merekesine arnalǵan saltanatty sapqa qatysty. Bul týraly QazAqparat BǴM silteme jasap habarlaıdy.

Ol túlekterdi mektep bitirý kúnimen quttyqtap, pedagogterge eńbekteri jáne ata-analarǵa balalarǵa kórsetken qoldaýlary úshin alǵys aıtty.

«Búgingi tańda oqýshylarymyz bilimimizdi, elimizdi halyqaralyq arenada laıyqty tanytyp júr. Mysaly, meniń qasymda kúni keshe ǵana Frantsııadan oralǵan Dúnıejúzilik gımnazıadanyń úsh jeńimpazy tur. Olar osy mektepte oqıdy. Oqýshylarymyz 86 medal jeńip alyp, álemniń 70 eliniń arasynan ozyp shyǵyp, 3-orynǵa ıe boldy. Al jeńip alǵan medaldardyń sany artyp keledi. Al endi túlekter ómirdiń jańa kezeńin bastaǵaly tur. Mektepti bitirseńiz de, oqý men izdenis jolynda eshqashan toqtamaý kerek. Bilim – eshqashan qunyn joǵaltpaıtyn, qunsyzdanýdan qoryqpaıtyn baılyq. Alda emtıhandar kútip tur. UBT eresek ómirdegi eń ońaı emtıhan ekenin bilseńizder eken. Ol úshin biz bıylǵy túlekterge birqatar jeńildik jasadyq. Endi sizder UBT-ny eki ret tapsyryp, grantqa úmitker bola alasyzdar. Bıyl Prezıdenttiń qoldaýynyń arqasynda granttar sanyn kóbeıtip otyrmyz. Atap aıtqanda, ýnıversıtetterde oqýǵa 73 myńǵa deıin jáne kolledjderde oqýǵa 128 myńǵa deıin grant bóldik. Jalpy alǵanda memleket sizderdiń bolashaqqa senimmen qaraýlaryńyz úshin tıisti sharalardy qabyldap jatyr», - dedi Bilim jáne ǵylym mınıstri Ashat Aımaǵambetov túlekterge.

Sondaı-aq mınıstr óskeleń urpaqqa bilim men tárbıe berip júrgen ustazdar men ata-analarǵa balalarǵa kórsetip júrgen qoldaýlary úshin alǵys aıtty.

«Bizdiń oqýshylar, muǵalimder men ata-analar indet synaǵynan abyroımen ótti. Qyrkúıekte «mektepti ashý kerek pe?» degen másele qyzý talqylandy. Al endi qabyldanǵan sheshimniń durystyǵyna esh kúmán joq. Pedagogterimizdiń qajyrly eńbeginiń arqasynda biz búkil álem jáne bilim berý júıesi basynan ótkergen qıyn kezeńderdi eńsere aldyq. Áriptesterime eńbekteri men balalarymyzǵa kórsetip jatqan qoldaýlary úshin alǵys aıtamyn. Árıne pandemııa kezinde ońaı bárine bolǵan joq. Degenmen ustaz eńbeginiń qanshalyqty mańyzdy jáne qundy ekenin túsingen ata-analar úlken qoldaý kórsetti», - dep atap ótti Ashat Aımaǵambetov.

Jalpy bıyl elimizde 3,6 mln oqýshy úshin sońǵy qońyraý soǵyldy. Onyń ishinde 170 myńnan astam 11 (12) synyp túlekteri, 302 myńnan astam 9-synyp oqýshylary. «Altyn belgi» tósbelgisine 8 139 úzdik oqýshy úmitker. Sondaı-aq bıyl 393 myńnan astam oqýshy 1-synypty aıaqtady.