Búgin 2,5 myńǵa jýyq qazaqstandyq bankrottyqqa ótinim berdi

ASTANA. QazAqparat – Bankrot atanǵysy kelgen qazaqstandyqtarǵa qatysty sońǵy málimet jarııalandy, dep habarlaıdy QazAqparat tilshisi Memlekettik kirister komıtetiniń baspasóz qyzmetine silteme jasap.

«3 naýryzda azamattardan bankrottyq týraly ótinish qabyldaý bastaldy. Saǵat 16:00-degi jaǵdaı boıynsha bankrottyq týraly sottan tys 1469 ótinish kelip tústi. Onyń ishinde eGov arqyly 1399, al e-Salyq Azamat arqyly 70 ótinim bar. Alǵashqy ótinish elektrondy úkimet portaly arqyly Jambyl oblysynan saǵat 09:05-te keldi», - delingen habarlamada.

Kirister komıteti usynǵan aqparatqa sáıkes, keshki saǵat 21:00-degi jaǵdaı boıynsha el aýmaǵynan 2466 ótinish túsken.

Bankrottyqqa ótinish berý boıynsha kósh basynda Túrkistan oblysy tur (289 ótinish). Odan ári 238 ótinishpen Almaty qalasy, úshinshi orynǵa Almaty oblysy (227 ótinish) ornalasqan.

Aıta ketsek, búgin elimizde bankrottyqqa ótinim qabyldaý bastaldy. Atalǵan rásim týraly tolyǵyraq osy silteme arqyly tanysýǵa bolady.

Sondaı-aq, bankrottyq jarııalaý qyzmeti eGov.kz jáne eGov Mobile qosymshasynda qoljetimdi.

Odan bólek, bankrottyq rásimdeýge ótinish berýdiń beınenusqaýy jarııalandy.