Búgin 18 jasqa tolǵan qyzylordalyq daýys berýge alǵash qatysty

QYZYLORDA. QazAqparat - Qyzylorda oblysynyń turǵyny Nursultan Ábdirazaqov 18 jasqa tolǵan búgingi týǵan kúninde alǵash ret daýys berdi, dep habarlaıdy QazAqparat tilshisi.

Nursultan Ábdirazaqov Aral aýdany, Jaqsyqylysh kentinde turady. Dál búgin 18 jasqa tolyp otyr. Óziniń tirkelgen №34 referendým ýchaskesine alǵashqylar qatarynda keldi.

Daýys berý rásiminiń aldynda kent ákimi Pazylbek Bersúgirov Nursultandy saltanatty túrde quttyqtady. Referendýmda daýys berý quqyǵyna ıe bolý qurmetine estelik syılyq tabystaldy.

«Meniń kámelet jasqa tolǵan kúnimniń elimiz úshin mańyzdy kúnmen tuspa-tus kelgeni óte qýanyshty jaıt boldy. Búgin men óz daýysymdy bere alamyn. Alda elimizdiń damýyna úles qosamyn», - dedi Nursultan Ábdirazaqov.

Eske salsaq, budan buryn Qyzylordada 101 jastaǵy maıdanger alǵashqy bolyp daýys bergenin jazǵan bolatynbyz.