Búgin 113-shi Nobel syılyǵymen marapattaý aptalyǵy ashylady
ASTANA. QazAqparat - Búgin Shvetsııada fızıologııa jáne medıtsına salasyndaǵy Nobel syılyǵynyń ıegeriniń esimin ataýmen 113-shi Nobel syılyǵymen marapattaý aptalyǵy ashylady, dep habarlaıdy ITAR-TASS.
Jaqyn kúnderi basqa nomınatsııalar boıynsha syılyq laýretattarynyń aty-jónderi belgili bolmaq. 7 qazanda shvedter astanasy Stokgolmde fızıka jónindegi Nobel komıtetiniń, al 8 qazanda hımııa jónindegi komıtetiniń sheshimderi jarııalanady. 10 qazanda Osloda álem syılyǵynyń laýreatynyń esimi jurtshylyqqa pash etilmek. Shvetsııa banki 1968 jyly taǵaıyndaǵan «Nobeldiń qurmetine ekonomıka boıynsha syılyqtyń» ıegeri 13 qazanda anyqtalady. Nobel komıteti ádebıet salasyndaǵy syılyqty taǵaıyndaıtyn shved akademııasy ázirge marapattaý rásiminiń qashan ótetinin málim etpedi, ádette ol qazan aıynyń bir beısenbisine josparlanatyn.
Alfred Nobel fızıologııa jáne medıtsına boıynsha laýreatty tańdaýdy 1810 jyly ashylǵan jáne qazirgi ýaqytta álemniń jetekshi medıtsınalyq bilim jáne ǵylym ortalyqtarynyń biri bolyp tabylatyn Stokgolmdaǵy Karolın ınstıtýtyna ósıet etken edi. Ondaǵy Nobel komıtetiniń turaqty bes múshesi bar, olar óz kezeginde keńesý úshin bul iske sarapshylardy da tarta alady.
Nobel komıtetteriniń eshbiri ázirge bul syılyqty alýǵa úmitkerler týraly eshqandaı málimetti jarııa etpedi.
