Búgin 1-synypqa barǵan atyraýlyqtardyń 80%-ǵa jýyǵy qazaqsha oqıdy

ATYRAÝ. QazAqparat – Búgin Atyraý oblysynda 15 myń 834 oqýshy birinshi synypqa bardy. Oqýshylardyń 80 paıyzǵa jýyǵy memlekettik tilde oqýdy tańdaǵan, dep habarlaıdy QazAqparat tilshisi.

Oblystyq bilim basqarmasy basshysynyń mindetin atqarýshy Aınagúl Dúısekenovanyń málimetinshe, búgin jalpy orta bilim beretin 200 mektepte alǵashqy qońyraý soǵyldy.

«Óńir mektepterinde 142 843 oqýshy sabaqqa barady. Onyń ishinde 15 834 oqýshy alǵash ret mektep tabaldyryǵyn attady. Birinshi synypqa qabyldanǵan balalar byltyrǵydan 600 oqýshyǵa kóp. Olardyń 80 paıyzǵa jýyǵy memlekettik tilde oqýdy tańdady. Oqýshylarǵa 12 424 muǵalim dáris beredi. Ótken jyly mektepterge jumys isteýge jańadan 600 pedagog keldi. Al, bıyl 1 myńǵa jýyq pedagog jumysqa qabyldandy», - deıdi Aınagúl Dúısekenova.

Onyń aıtýyna qaraǵanda, 2021-2025 jyldar aralyǵynda jańadan 48 mekteptiń jańa ǵımaratyn salý josparlanyp otyr. Qazir jańa 10 mektep pen 1 mekteptiń janynan japsarlas ǵımarat qurylysy bastalǵan.

«Atyraý oblysynda bıyl alty mekteptiń qurylysyn júrgizýge respýblıkalyq bıýdjetten 4 mlrd teńge bólindi. Jańa nysannyń beseýin Atyraý qalasynda, taǵy bireýin Inder aýdanynda salý kózdelgen. Ózge mektepter úshin jer telimin bólý máselesi qarastyrylyp otyr. Jańa bilim uıalary paıdalanýǵa berilgen soń qosymsha 20 myńǵa jýyq oqýshy mektepke qabyldanady. Mektepterde 2 myńnan asa turaqty jumys orny ashylady», -dep habarlady Aınagúl Dúısekenova.

Eske sala ketelik, buǵan deıin Atyraý oblysynda mektep tapshylyǵy máselesi qalaı sheshiletinin, 11 mektepte oqýshylar úsh aýysymda oqıtynyn jazǵan bolatynbyz.