Buǵattaý júıesi engizilgeli beri Almatyda uıaly telefondar urlyǵy azaıdy
ALMATY. QazAqparat - Buǵattaý júıesi engizilgeli beri uıaly telefondardy urlaý áreketteri azaıdy, - dep habarlaıdy búgin Almaty qalalyq ІІD-niń baspasóz qyzmetinen.
Esterińizge sala ketelik, Almaty polıtseıleri sotqa deıingi tergeý aıasynda ótken jyldyń jeltoqsan aıynan bastap, urlanǵan uıaly telefondar men basqa da mobıldi qurylǵylardy IMEI kodtary boıynsha buǵattaýǵa kirisken bolatyn. Bul sharaǵa uıaly operatorlar qoldaý kórsetip jatyr.
«Sodan beri qalalyq ІІD bólimsheleri men qyzmetteri jáne aýdandyq ІІB tarapynan uıaly baılanys operatorlaryna mobıldi qurylǵylardy buǵattaý boıynsha 700-den astam aryz jiberildi. Bul is-shara telefon ıesiniń jazbasha kelisimi negizinde júzege asyrylyp jatyr. Sondaı-aq, taǵy bir aıta ketetin jáıt, osy sharanyń arqasynda urlanǵan uıaly telefondar jáne basqa da mobıldi qurylǵylar materıaldyq qundylyǵynan aırylady. Biz buǵan deıin boljam boıynsha alǵashqy kezeńde uıaly telefondardyń urlanýyn 25 paıyzǵa tómendetýge bolady degen bolatynbyz. Bul kórsetkishke qańtar aıynyń alǵashqy onkúndiginde-aq qol jetkizildi. Al qazir bul kórsetkish - 32 paıyzdy quraıdy», - dedi óz sózinde Almaty qalalyq ІІD Krımınaldy polıtsııa basqarmasynyń basshysy, polıtsııa podpolkovnıgi Janbolat Zıadın.
Sondaı-aq, polıtsııa bólimindegiler qylmystyń bul túrin azaıtý maqsatynda jańa tehnologııalardyń qoldanylyp jatqandyǵyn jetkizdi. Jalpy - IMEI kod boıynsha uıaly baılanys qyzmetin ýaqytsha toqtatý - óte utymdy shara. Túrkııa, Aýstralııa, Frantsııa, Germanııa, Ýkraına jáne Eýropanyń basqa da elderinde bul shara keńinen qoldanylady.
«Bul jobany bastamas buryn Almaty q. ІІD uıaly operatorlarmen yntymaqtastyq jóninde memorandýmǵa qol qoıyldy. Sol memorandým aıasynda birlese áreket jasaýdyń tıimdi ádisi qoldanyldy. Qalalyq prokýratýramen birlese otyryp, osy baǵytta jumys isteýdiń biryńǵaı algorıtmi ázirlendi. Mysaly, mobıldi qurylǵysy urlanǵan azamatty jábirlenýshi dep moıyndaý týraly qaýly shyqqan soń, ishki ister organdary telefon ıesine uıaly baılanys operatorlarynyń atyna IMEI kod boıynsha abonenttik qurylǵynyń jumysyn ýaqytsha toqtatý, ıaǵnı buǵattaý týraly aryz jazý kerektigin jáne onyń múmkin bolar saldaryn túsindiredi. Árbir aryzǵa tergeýshiden ilespe hat tirkeledi. Ol uıaly telefonnyń urlanǵanyn jáne oǵan jábirlenýshiniń menshik quqyǵynyń bekitilgendigin rastaıdy.
Al uıaly baılanys kompanııalary óz kezeginde mobıldi qurylǵyny buǵattaý týraly aryz qabyldanǵan soń, naqty sebepterin kórsete otyryp, ishki ister organdaryna uıaly telefonnyń buǵattalǵan nemese buǵattalmaǵany jóninde habarlama jiberedi», - dedi J. Zıadın.
