Buǵan deıin elimizde reformalar dál osyndaı keń aýqymda talqylanbaǵan - Ýálı
SEMEI. KAZINFORM – Semeı qalasyndaǵy Abaı atyndaǵy kitaphanada «Qaladan – aýylǵa» óńirlik forýmy bastaldy.
Aýqymdy sharaǵa oblys ákimi Berik Ýálı, Premer-mınıstrdiń keńesshisi Eraly Toǵjanov, «Amanat» partııasynyń hatshysy Eldar Jumaǵazıev, Qarjy vıtse-mınıstri Abzal Beısenbekuly, Parlament Májilisiniń depýtaty Nurtaı Sabılıanov, Parlament Senatynyń depýtaty Qaırat Tastekeev, Aýyl sharýashylyǵy mınıstrliginiń mal sharýashylyǵy departamenti dırektorynyń orynbasary Qaırat Kóshenov, barlyq deńgeıdegi máslıhat depýtattary, qala jáne aýdan ákimderi, aýyldyq okrýgter men kent ákimderi, basqarma basshylary, iri sharýa qojalyqtarynyń jetekshileri, sondaı-aq Shyǵys Qazaqstan jáne Pavlodar oblystarynyń ókilderi qatysýda. Forýmǵa 500-den astam adam jınaldy.
Aımaq basshysy forýmnyń ashylýynda sóılegen sózinde Qasym-Jomart Toqaev júzege asyryp jatqan saıası reformalar aıasyndaǵy jańa Konstıtýtsııa tereń saralanǵan, álemdik úzdik tájirıbelerdi eskergen, ulttyq múdde men adam quqyǵyn tolyq qorǵaýǵa baǵyttalǵan sapaly qujat ekenin atap ótti.
– Búgingi basqosý aýyl sharýashylyǵy nemese jergilikti basqarý máselelerin ǵana talqylaıtyn alań emes. Bul – elimizdiń damý baǵytyn, memleket pen halyq arasyndaǵy ózara jaýapkershilikti aıqyndaıtyn mańyzdy forým. Memleket basshysy atap ótkendeı, jańa Konstıtýtsııaǵa qatysty pikir almasý bir kúnniń nemese bir aıdyń sharýasy bolǵan joq. Jarty jyldan astam ýaqyt boıy qoǵamda jan-jaqty talqylaý ótti. 130 adamnan turatyn Konstıtýtsııalyq komıssııa qurylyp, onyń quramyna bilikti zańgerler, sarapshylar men qoǵam ókilderi endi. Bul joly sheshimdi ózimiz qabyldadyq, komıssııa quramynda sheteldik mamandar bolǵan joq, – dedi Berik Ýálı.
Oblys ákimi Prezıdenttiń azamattarǵa byltyr qazan aıynan bastap óz usynystaryn ashyq aıtýǵa múmkindik berilgenin atap ótkenin jetkizdi. eGov jáne eOtinish platformalary arqyly myńdaǵan usynys túsip, barlyǵy muqııat qaralǵan. Komıssııa jumysy barynsha ashyq júrgizilip, talqylaýlar tikeleı efırde kórsetilgen.
– Buǵan deıin elimizde reformalar dál osyndaı keń aýqymda, búkil halyqtyń qatysýymen talqylanbaǵan. Bul – «Halyq únine qulaq asatyn memleket» qaǵıdatynyń naqty kórinisi. Sondyqtan jańa Konstıtýtsııany naǵyz halyqtyq Konstıtýtsııa dep tolyq aıta alamyz. Osy Ata Zańda bekitilgen qaǵıdattardy aýylda naqty iske qalaı aınaldyramyz? Eger memleket adam úshin bolsa, aýyldaǵy árbir turǵynnyń turmysy, árbir sharýa qojalyǵynyń damýy – bizdiń basty ólshemimiz bolýy tıis, – dedi aımaq basshysy.
Aıta keteıik, elimizde medıatorlardy oqytý baǵdarlamalarynyń tizimi bekitildi.