Buǵan deıin órtengen ormandarǵa baılanysty jappaı tergeý jumystaryn júrgizý qajet - Ómirzaq Shókeev
ASTANA. Tamyzdyń 9-y. QazAqparat /Marlan Jıembaı/ - Buǵan deıin órt qushaǵyna oranǵan ormandarǵa baılanysty jappaı tergeý jumystaryn júrgizý qajet.
Bul týraly búgin Úkimettegi selektorlyq keńeste Birinshi vıtse-premer Ómirzaq Shókeev aıtty.
«Aýa-raıynyń aptap ystyq bolýyna ári Reseıdegi oryn alǵan tótenshe jaǵdaıǵa baılanysty jergilikti bılik baıypty oılanyp, jınaqy bolýy kerek», dep atap ótken ol respýblıkadaǵy ormandardyń 80 paıyzy - ákimdikterdiń, al 20 paıyzy Aýyl sharýashylyǵy mınıstrligi Orman jáne ańshylyq sharýashylyǵynyń qaramaǵynda turǵandyǵyn eske sala ketti. Osyǵan oraı ol barlyq ákimdikter belgili bir shtabtar qurý kerek degen oıyn alǵa tartty. Sondaı-aq árbir orman sharýashylyǵynaǵy órt qaýipsizdigine jaýapty tulǵa taǵaıyndaý qajettigin basa aıtqan Ó.Shókeev, «biz bul jaqtan AShM, TJM, ІІM jáne Qorǵanys mınıstrliginiń ókilderin is-saparǵa jiberýge daıynbyz. Barlyq orman sharýashylyqtaryna órt qaýpi bar maýsymǵa daıyndyǵyna jappaı teserý jumystaryn júrgizý qajet. Onyń ishinde janar-jaǵarmaıǵa, habarlandyrýlar júıesine, ásirese, ormandardaǵy munaralarǵa tekserý júrgizý kerek. Jalpy ormandarda munaralar bar ma? Bolsa ol munaralarda kúndiz-túni boıǵy kezekshilikti uıymdastyrý kerek», dedi.
Birinshi vıtse-premer sonymen qatar buǵan deıin órt qushaǵyna oranǵan ormandarda tergeý jumystaryn júrgizý qajettigin basa aıtty. «Búgin málimdengen aqparattarǵa qaraǵanda, máselen, Shyǵys Qazaqstan oblysynda 50 órt tirkelip, 25 gektar jer jandy. Al Basaman orman sharýashlyǵynda 5 órt oryn alyp, 1900 gektar órt qushaǵyna orandy. Bul órtten góri josparly is-sharaǵa kóbirek uqsaıdy. Bundaı faktilerdiń oryn alǵany da jasyryn emes. Sheneýnikti jumystan bosatqan durys, biraq bul máselege baısaldy qaraǵan jón», dedi ol óz sózinde.
